ലോറി ഓടിക്കുന്നതിനിടെ ഡ്രൈവർ ഹൃദയാഘാതം മൂലം മരിച്ചു, നിയന്ത്രണം നഷ്ടമായ ലോറിയിടിച്ച് മൂന്നു പേർക്ക് പരിക്ക്

മലപ്പുറം: മലപ്പുറം വളാഞ്ചേരിയിൽ ലോറി ഡ്രൈവര്‍ കുഴഞ്ഞ് വീണതിന് പിന്നാലെയുണ്ടായ അപകടത്തിൽ മൂന്ന് പേർക്ക് പരിക്ക്. ലോറി ഡ്രൈവര്‍ മുജീബ് റഹ്മാൻ ഹൃദയാഘാതത്തെ തുടർന്ന് മരിച്ചു. നിയന്ത്രണം നഷ്ടമായ ലോറി ചെങ്കൽ ക്വാറിയിലെ മൂന്ന് തൊഴിലാളികളെ ഇടിച്ചു പരിക്കേറ്റു.

ഇന്ന് ഉച്ചയ്ക്ക് രണ്ടോടെയാണ് അപകടമുണ്ടായത്. ചെങ്കൽ ക്വാറിയിലേക്ക് ലോഡ് എടുക്കുന്നതിനായി വരുന്നതിനിടെയാണ് അപകടം. ക്വാറിയിൽ വെച്ച് ലോറി ഓടിക്കുന്നതിനിടെ ഡ്രൈവര്‍ മുജീബ് കുഴഞ്ഞു വീഴുകയായിരുന്നു. ഇതോടെ നിയന്ത്രണം വിട്ട ലോറി മുന്നോട്ട് നീങ്ങി ചെങ്കൽ ക്വാറിയിലുണ്ടായിരുന്ന മൂന്നു തൊഴിലാളികളെ ഇടിക്കുകയായിരുന്നു.

കുഴഞ്ഞു വീണ മുജീബ് റഹ്മാനെയും തൊഴിലാളികളെയും ആശുപത്രിയിലെത്തിച്ചെങ്കിലും ഡ്രൈവറുടെ ജീവൻ രക്ഷിക്കാനായില്ല. പരിക്കേറ്റ തൊഴിലാളികള്‍ ആശുപത്രിയിൽ ചികിത്സയിലാണ്.