കോഴിക്കോട്: താമരശ്ശേരി ചുരത്തില്‍ ബ്രേക്ക് നഷ്ടപ്പെട്ട ചരക്ക് ലോറി രണ്ട് തട്ടുകടകളിലേക്ക് ഇടിച്ചുകയറി.
അപകടത്തില്‍ ലോറി ഡ്രൈവർക്ക് പരിക്കേറ്റു. ഇന്ന് പുലർച്ചെ 1.30 ഓടെയാണ് സംഭവം നടന്നത്. മൈസൂരില്‍ നിന്ന് കോട്ടയത്തേക്ക് ചരക്കുമായി പോകുകയായിരുന്ന ലോറിയാണ് അപകടത്തില്‍പ്പെട്ടത്.
അപകടത്തില്‍ പെരിന്തല്‍മണ്ണ സ്വദേശിയായ ലോറി ഡ്രൈവർ ജുറൈസിന് പരിക്കേറ്റു. അടിയന്തര വൈദ്യസഹായത്തിനായി ഇദ്ദേഹത്തെ ഈങ്ങാപ്പുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. പരിക്ക് സാരമുള്ളതല്ലെന്ന് പോലീസ് അറിയിച്ചു.
Whatsapp Group 1 | Whatsapp Group 2 |Telegram Group
ലോറിയിലുണ്ടായിരുന്ന ക്ലീനർ ദിനേഷ് പരിക്കേല്‍ക്കാതെ രക്ഷപ്പെട്ടു. താമരശ്ശേരി ചുരത്തിലെ 28-ാം മൈലിലാണ് അപകടം നടന്നത്. ആളൊഴിഞ്ഞ സമയത്തും കടകള്‍ അടച്ചിരുന്നതിനാലും വൻ ദുരന്തം ഒഴിവായി.
പകല്‍ സമയങ്ങളില്‍ ഈ ഭാഗത്ത് ധാരാളം വാഹനങ്ങളും ആളുകളും ഉണ്ടാവാറുണ്ട്. അടിവാരം സ്വദേശികളായ കാദർ, ഗഫൂർ എന്നിവരുടെ ഉടമസ്ഥതയിലുള്ള രണ്ട് തട്ടുകടകളും പൂർണമായും തകർന്നു. ഏകദേശം മൂന്ന് ലക്ഷം രൂപയുടെ നാശനഷ്ടം കണക്കാക്കുന്നു.
അടിവാരം പോലീസ് ഔട്ട് പോസ്റ്റിലെ എസ്.ഐ. ശ്രീനിവാസന്റെ നേതൃത്വത്തില്‍ പോലീസ് സ്ഥലത്തെത്തി തുടർ നടപടികള്‍ സ്വീകരിച്ചു.
