ജില്ലയ്ക്കകത്ത് പൊതുഗതാഗതം അനുവദിക്കണം ; സാമൂഹിക അകലം പാലിച്ച് ഭക്ഷണം കഴിക്കാവുന്ന രീതിയില്‍ ഹോട്ടലുകള്‍ തുറക്കാന്‍ അനുവദിക്കണം : ഇളവുകള്‍ക്കായി കേന്ദ്രത്തിന് കേരളം സമര്‍പ്പിക്കുന്ന പട്ടിക ഇങ്ങനെ
സ്വന്തം ലേഖകന്‍
തിരുവനന്തപുരം: രാജ്യത്ത് പ്രഖ്യാപിച്ചിരിക്കുന്ന മൂന്നാംഘട്ട ലോക് ഡൗണ്‍ അവസാനിക്കാറായ ഘട്ടത്തില്‍ കേന്ദ്രത്തോട് ആവശ്യപ്പെട്ട ഇളവുകളുടെ പട്ടിക പൂര്‍ത്തിയായി. സംസ്ഥാനത്ത് അതാത് ജില്ലയ്ക്കകത്ത് പൊതുഗതാഗതം അനുവദിക്കണമെന്ന് സംസ്ഥാന സര്‍ക്കാര്‍ കേന്ദ്രത്തോട് ആവശ്യപ്പെടും.
രാജ്യത്ത് ലോക ഡൗണ്‍ അവസാനിക്കാറായ ഘട്ടത്തില്‍ മുഖ്യമന്ത്രി പിണറായി വിജയന്‍ ഇന്നു രാവിലെ വിളിച്ചു ചേര്‍ത്ത ഉന്നത തലയോഗത്തിലാണ് ഈ നിര്‍ദേശം ഉയര്‍ന്നത്.
Whatsapp Group 1 | Whatsapp Group 2 |Telegram Group
ഇതിനൊപ്പം സാമൂഹിക അകലം പാലിച്ച് ഭക്ഷണം കഴിക്കാവുന്ന രീതിയില്‍ ഹോട്ടലുകള്‍ തുറക്കാന്‍ അനുവദിക്കണമെന്നും ആവശ്യപ്പെടുമെന്നും മുഖ്യമന്ത്രി വാര്‍ത്താസമ്മേളത്തില്‍ പറഞ്ഞു.
ഇതുള്‍പ്പെടെ കേന്ദ്രത്തിന് സമര്‍പ്പിക്കേണ്ട നിര്‍ദേശങ്ങളുടെ പട്ടിക കേരളം തയ്യാറാക്കി. സംസ്ഥാനത്തിന് അകത്ത് ട്രെയിന്‍ ഗതാഗതത്തിനുള്ള അനുവാദം, മെട്രോ ട്രെയിന്‍ പ്രവര്‍ത്തിപ്പിക്കാനും ഓട്ടോറിക്ഷകള്‍ ഓടാന്‍ അനുവാദം നല്‍കണം എന്നീ ആവശ്യങ്ങളും കേരളം ഉന്നയിക്കുന്നുണ്ട്.
അതേസമയം, സംസ്ഥാനത്ത് ഇന്ന് അഞ്ച് പേര്‍ക്ക് കൂടി വൈറസ് ബാധ സ്ഥിരീകരിച്ചു. മലപ്പുറത്ത് മൂന്നും , പത്തനംതിട്ട, കോട്ടയം എന്നിവിടങ്ങളില്‍ ഒരോ കേസുകള്‍ കൂടി സ്ഥിരീകരിച്ചത്. ഇതോടെ സംസ്ഥാനത്ത് 34 മേഖലകളെ പുതിയ ഹോട്ട്സ്പോട്ടുകളായി പ്രഖ്യാപിക്കുകയും ചെയ്തു.
ഇതുവരെ സംസ്ഥാനത്ത് പോസിറ്റീവായ കേസുകള്‍ റിപ്പോര്‍ട്ട് ചെയ്തത് പുറത്ത് നിന്നും വന്നവരിലാണ്. 31616 ഇപ്പോള്‍ നിരീക്ഷണത്തിലുള്ളത്. 31141 പേര്‍ വീടുകളിലും 473 പേര്‍ ആശുപത്രികളിലും നിരീക്ഷണത്തിലാണ്. 95 പേരെയാണ് ഇന്ന് ആശുപത്രിയില്‍ പ്രവേശിപ്പിച്ചത്. 38547 സാമ്പിളുകളാണ് പരിശോധനയ്ക്ക് അയച്ചത്.
37727 എണ്ണം നെഗറ്റീവ് ആണ്. രാജ്യത്ത് കോവിഡ് ആദ്യം സ്ഥിരീകരിച്ചത് കേരളത്തിലാണ്. കോവിഡ് വ്യാപനം ഒരുപരിധി വരെ തടയാന്‍ കഴിഞ്ഞു. ഇതരസംസ്ഥാനത്ത് റെയില്‍വേ സ്റ്റേഷനുകളില്‍ എത്തുന്നവര്‍ക്കായി പരിശോധന കര്‍ശനമാക്കും.
ഇത് വിമാനത്താവളത്തിലേത് പോലെയായിരിക്കുമെന്നും മുഖ്യമന്ത്രി പറഞ്ഞു. മാസ്‌കുകള്‍ ധരിക്കാത്തവര്‍ക്കെതിരെ കര്‍ശന നടപടികള്‍ സ്വീകരിക്കുമെന്നും മുഖ്യമന്ത്രി പറഞ്ഞു.
