കോട്ടയത്ത് നിയമ സേവന കേന്ദ്രം ആരംഭിച്ചു ; വിവിധങ്ങളായ അവഗണനകളിൽ നിന്ന് വയോജനങ്ങൾക്ക് നിയമപരിരക്ഷ ഉറപ്പാക്കുമെന്ന് ജില്ലാ ജഡ്ജി എം മനോജ്

കോട്ടയം: ദുർബല വിഭാഗങ്ങൾക്ക് നിയമ സഹായം ഉറപ്പാക്കുന്നതിനായി കോട്ടയത്ത് നിയമ സേവന കേന്ദ്രം പ്രവർത്തനമാരംഭിച്ചു. കോട്ടയം ജില്ലാ സെഷൻസ് ജഡ്ജ് എം മനോജ് സേവന കേന്ദ്രം ഉദ്ഘാടനം ചെയ്തു.

വിവിധ കാരണങ്ങളാൽ സമാധാന വിശ്രമജീവിതം ലഭിക്കുന്നതിൽ നിന്ന് അവഗണിക്കപ്പെട്ട വയോജനങ്ങൾക്ക് വേണ്ട നിയമ പരിരക്ഷ ഉറപ്പാക്കുമെന്ന് അദ്ദേഹം പറഞ്ഞു.

വയോജനങ്ങൾക്കും ദുർബല വിഭാഗങ്ങൾക്കും മറ്റു ബുദ്ധിമുട്ടുകൾ അനുഭവിക്കുന്നവർക്കും സൗജന്യ നിയമസഹായം ലഭ്യമാക്കുക ലക്ഷ്യത്തോടുകൂടിയാണ് ജില്ലാ ലീഗൽ സർവ്വീസ് അതോറിറ്റിയുടെ ആഭിമുഖ്യത്തിൽ കോട്ടയത്ത് നിയമ സേവന കേന്ദ്രം പ്രവർത്തനമാരംഭിച്ചത്.

ജില്ലാ നിയമ സേവന അതോറിറ്റി സെക്രട്ടറിയും സബ് ജഡ്ജിയുമായ പ്രവീൺ കുമാർ ജി അദ്ധ്യക്ഷത വഹിച്ച യോഗത്തിൽ ജില്ലാ പോലീസ് ചീഫ് എ.ഷാഹുൽ ഹമീദ്, സബ് കളക്ടർ രഞ്ജിത് ഡി എന്നിവർ ആശംസകളർപ്പിച്ചു.

കോട്ടയം ബാർ അസ്സോസിയേഷൻ പ്രസിഡൻറ് അഡ്വ. സജി കൊടുവത്ത് നിയമ സഹായത്തെപ്പറ്റി ക്ലാസ് നയിച്ചു. ചീഫ് ഡിഫൻസ് കൗൺസൽ അഡ്വ.അനിൽ ഐക്കര, നിയമ സേവന അതോറിറ്റി ഓഫീസർ അരുൺ കൃഷ്ണ ആർ തുടങ്ങിയവർ സംസാരിച്ചു.