കല്പ്പറ്റ: വയനാട് മേപ്പാടി മുണ്ടക്കൈയിലുണ്ടായ ഉരുള്പൊട്ടലില് വലിയ നാശനഷ്ടം. നിരവധി പേര്ക്ക് ജീവന് നഷ്ടമാകാന് സാധ്യത.
ഒരു ഗ്രാമം പൂര്ണ്ണമായും ഒറ്റപ്പെട്ടു. ഈ സാഹചര്യത്തിലാണ് രക്ഷാപ്രവര്ത്തനത്തിന് സൈന്യം എത്തുന്നത് പുലര്ച്ചെ രണ്ടു മണിയോടെയാണ് മുണ്ടക്കൈയില് ഉരുള്പ്പൊട്ടിയത്. ഒറ്റപെട്ടവരെയെല്ലാം സുരക്ഷിതമാക്കി പുറത്ത് എത്തിക്കാനാണ് ശ്രമങ്ങള് നടത്തുന്നത്. നിരവധി പേരെ കണ്ടെത്താനുണ്ടെന്ന് നാട്ടകാര് പറയുന്നു. മുണ്ടകൈ, ചുരല്മല, അട്ടമല ഭാഗങ്ങളില് വന് നാശനഷ്ടങ്ങളാണ് ഉണ്ടായിട്ടുള്ളത്. മൂന്ന് തവണ മണ്ണിടിഞ്ഞു
സൈന്യത്തിനൊപ്പം ഫയര്ഫോഴ്സും രക്ഷാപ്രവര്ത്തനത്തില് സജീവമാകും. തൃശൂര് ജില്ല മുതലുള്ള എല്ലാ ഫയര്ഫോഴ്സ് യൂണിറ്റുകളും രക്ഷാപ്രവര്ത്തനത്തില് സജീവമാകും. വെള്ളര്മല ജിവിഎച്ച്എസ് പൂര്ണമായി മുങ്ങി. നേരം പുലര്ന്നതോടെ ഓരോ വീടുകളിലും കയറിയുള്ള രക്ഷാപ്രവര്ത്തനമാണ് നടക്കുന്നത്. പുലര്ച്ചെ രക്ഷാപ്രവര്ത്തനം നടത്തുന്നതിനിടെ വലിയ രീതിയില് മലവെള്ളപ്പാച്ചിലും മണ്ണിടിച്ചിലും ഉണ്ടാവുകയും ചെയ്തു. രക്ഷാപ്രവര്ത്തകര് ഉള്പ്പെടെ ഓടിരക്ഷപ്പെട്ടു. നിരവധി വാഹനങ്ങള് ഒഴുകിപോയി. വീടുകളിലും വെള്ളവും ചെളിയും കയറി. ഇന്നലെ തന്നെ മുണ്ടക്കൈ പുഴയില് വലിയ കുത്തൊഴുക്കും മലവെള്ളപ്പാച്ചിലും രൂപപ്പെട്ടിരുന്നു. എന്നാല് ഇത്രയേറെ മണ്ണിടിച്ചില് ആരും പ്രതീക്ഷിച്ചില്ല.
Whatsapp Group 1 | Whatsapp Group 2 |Telegram Group
പുലര്ച്ചെ ഒരു മണിയോടെ കനത്ത മഴയ്ക്കിടെയാണ് മുണ്ടക്കൈ ടൗണ്ടില് ആദ്യ ഉരുള്പൊട്ടലുണ്ടായത്. രക്ഷാപ്രവര്ത്തനം നടക്കുന്നതിനിടെ നാലു മണിയോടെയാണ് ചൂരല്മല സ്കൂളിനു സമീപം രണ്ടാമത്തെ ഉരുള്പൊട്ടലുണ്ടായത്. മൂന്ന് ഉരുള്പൊട്ടല് ഉണ്ടായതായി നാട്ടുകാര് പറയുന്നു. ക്യാംപ് പ്രവര്ത്തിച്ചിരുന്ന സ്കൂളില് വീടുകളിലും കടകളിലും വെള്ളവും ചെളിയും നിറഞ്ഞു. മേഖലയില് നാനൂറോളം കുടുംബങ്ങള് ഒറ്റപ്പെട്ടതായാണ് വിവരം. നിരവധി പേര്ക്ക് പരുക്കേറ്റു. നിരവധി വാഹനങ്ങള് ഒഴുകിപ്പോയി.
പ്രദേശത്തെ പ്രധാന റോഡും ചൂരല്മല ടൗണിലെ പാലവും തകര്ന്നതോടെ രക്ഷാപ്രവര്ത്തനം ദുഷ്കരമായി. മുണ്ടക്കൈ അട്ടമല പ്രദേശത്തേക്കുള്ള ഏക പാലമാണിത്. രാത്രി ആയതിനാലും പ്രദേശത്തെ വൈദ്യുതിബന്ധം വിച്ഛേദിക്കപ്പെട്ടു. അഗ്നിരക്ഷാ സേനയും നാട്ടുകാരും രക്ഷാപ്രവര്ത്തനം ആരംഭിച്ചു. ജില്ലാ കലക്ടര്, ജില്ലാ പൊലീസ് മേധാവി, ടി സിദ്ദിഖ് എംഎല്എ ഉള്പ്പെടെയുള്ളവര് സ്ഥലത്തെത്തി രക്ഷാപ്രവര്ത്തനം ഏകോപിപ്പിക്കുകയാണ്. ഫയര്ഫോഴ്സ്, എന്ഡിആര്എഫ് ടീം സ്ഥലത്തെത്തിയിട്ടുണ്ട്. സൈന്യവും എത്തും.
പ്രദേശത്ത് ഒറ്റപ്പെട്ട ആളുകളെ പുറത്തെത്തിക്കാന് ശ്രമം തുടരുകയാണ്. വലിയ ശബ്ദത്തോടെ ഉരുള്പൊട്ടി എന്ന് പ്രദേശവാസികള് പറയുന്നു. 2019ല് ഉരുള്പൊട്ടലുണ്ടായ പുത്തുമലയ്ക്കു സമീപമാണ് മുണ്ടക്കൈ.
