കുട്ടിക്കാനം കേന്ദ്രീകരിച്ച് ചാരിറ്റബിൾ ട്രസ്റ്റിന്‍റെ പേരിൽ മുറി വാടകയ്ക്കെടുത്ത് ചീട്ടുകളി; പതിനേഴോളം പേർ അറസ്റ്റിൽ; ഇവരുടെ കൈയ്യിൽ നിന്നും ഓൺലൈൻ മുഖേനയുമായി ഒരു ലക്ഷത്തോളം രൂപ പിടിച്ചെടുത്തു

സ്വന്തം ലേഖകൻ

കുമളി: കുട്ടിക്കാനം കേന്ദ്രീകരിച്ച്ചാരിറ്റബിൾ ട്രസ്റ്റിന്‍റെ പേരിൽ റും വാടകയ്ക്കെടുത്ത് ചീട്ടുകളി നടത്തിയിരുന്ന സംഘം പിടിയിൽ. പീരുമേട് സി. ഐ സുമേഷ് സുധാകരന്‍റെ നേതൃത്വത്തിലുള്ള സംഘം പതിനേഴോളം പേരെ പിടികൂടി. തുടർന്ന് ഇവരെ ജാമ്യത്തിൽ വിട്ടയച്ചു.

കുട്ടിക്കാനം കേന്ദ്രീകരിച്ച് കഴിഞ്ഞ ഒരു വർഷത്തോളമായി ചീട്ടുകളി സംഘം പ്രവർത്തിക്കുന്നതായി പോലീസിന് ലഭിച്ച രഹസ്യ വിവരത്തിന്‍റെ അടിസ്ഥാനത്തിൽ നടത്തിയ പരിശോധനയിലാണ് അറസ്റ്റ് ചെയ്തത്. സംഭവം ശ്രദ്ധയിൽ പെട്ടപ്പോൾ ഈ ക്ലബ് അധികൃതർക്ക് പോലീസ് ആദ്യം നോട്ടീസ് നൽകിയിരുന്നു. കത്ത് ലഭിച്ച ഉടൻ ട്രസ്റ്റ് അധികൃതർ ചീട്ടുകളി പോലുള്ള പ്രവർത്തനങ്ങൾ ഇവിടെ നടക്കുന്നില്ലന്ന് മറുപടിയും നൽകിയിരുന്നു. എന്നാൽ പോലീസ് പിന്നീടും രഹസ്യമായി ഇവിടം നീരീക്ഷിച്ച് വന്നിരുന്നു. ഇതിന്‍റെ അടിസ്ഥാനത്തിലാണ് ചീട്ടുകളി സംഘത്തെ പിടികൂടുന്നത്.

ഇവരുടെ കൈയ്യിൽ നിന്നും ഓൺലൈൻ അക്കൗണ്ട് മുഖേനയുമായി ഒരു ലക്ഷത്തോളം രൂപ പിടിച്ചെടുത്തു. കൂടാതെ മൊബൈൽ ഫോണുകൾ അടക്കം ഉള്ള വസ്തുക്കളും പിടിച്ചെടുത്തു. പ്രദേശവാസികളായ ആരും ഈ സംഘത്തിൽ ഇല്ലന്ന് പോലീസ് പറഞ്ഞു. പുറത്ത് നിന്നുള്ള ആളുകളാണ് ഇതിന്‍റെ നടത്തിപ്പും ചീട്ടുകളിക്കാൻ എത്തുന്നത്.

പീരുമേട് സി ഐ സുമേഷ് സുധാകരന്‍റെ നേതൃത്വത്തിൽ എസ് ഐ അജേഷ് കുമാർ, ഗ്രേഡ് എസ് ഐ പി സി സജി, എസ് ഇ പി ഒമാരായ അനീഷ് ഗീവർഗീസ്, സി പി ഒ രതീഷ്, ജോമോൻ, ലാലു എന്നിവരുടെ നേതൃത്വത്തിലാണ് അറസ്റ്റ് ചെയ്തത്.