സ്വന്തം ലേഖിക
കുറുപ്പന്തറ: പോലീസ് പരിശോധന ഒഴിവാക്കാന്‍ സിമന്‍റ് കട്ടയുമായി വീതി കുറഞ്ഞ പഞ്ചായത്ത് റോഡിലൂടെ പോകാന്‍ ശ്രമിച്ച ടിപ്പര്‍ ലോറി റോഡരികിലെ മണ്ണിടിഞ്ഞു തോട്ടിലേക്കു ചെരിഞ്ഞു. കുറുപ്പന്തറ കടവിനു സമീപത്തുനിന്നു കുറുപ്പന്തറ പ്രാഥമികാരോഗ്യ കേന്ദ്രത്തിനു സമീപത്തേക്കെത്തുന്ന റോഡിലൂടെ കടന്നുപോകാന്‍ ശ്രമിക്കുമ്പോഴാണ് അപകടം.
കുറുപ്പന്തറ കടവിനു സമീപം ഇന്നലെ രാവിലെ 10.30ഓടെയാണ് അപകടം. തോടിന്‍റെ വശത്തുകൂടി കടന്നുപോകുന്ന റോഡാണിത്.
ചെറുവാഹനങ്ങള്‍ മാത്രം കടന്നുപോകുന്ന റോഡ് മഴക്കാലമായതിനാല്‍ അപകട ഭീഷണിയിലായിരുന്നു.
Whatsapp Group 1 | Whatsapp Group 2 |Telegram Group
ഭാരവാഹനങ്ങള്‍ കടന്നുപോയാല്‍ അപകടസാധ്യതയുള്ളതിനാല്‍ ടിപ്പര്‍ ലോറി ഇതിലേ പ്രവേശിച്ചപ്പോള്‍ത്തന്നെ നാട്ടുകാര്‍ എതിര്‍ത്തിരുന്നു. എതിര്‍പ്പവഗണിച്ചു മുന്നോട്ടുപോകാന്‍ ശ്രമിച്ചപ്പോളാണ് തോടിന്‍റെ വശത്തെ റോഡിടിഞ്ഞു ലോറി കുടുങ്ങിയത്.
ഉടന്‍തന്നെ മുന്‍വശത്തുനിന്നു ജെസിബി ഉപയോഗിച്ചു ഉയര്‍ത്തിയ ശേഷം പുറകുവശത്ത് ക്രെയിനുപയോഗിച്ചു ലോറി കെട്ടി വലിച്ചു ഇവിടെ നിന്നും മാറ്റിയതിനാല്‍ വന്‍ദുരന്തം ഒഴിവായി.മാന്‍വെട്ടത്തുനിന്നും സിമന്‍റ് കട്ടയുമായെത്തിയ ടിപ്പര്‍ ലോറിയാണ് അപകടത്തില്‍പ്പെട്ടത്.
