യാത്രക്കാരുടെ ശ്രദ്ധയ്ക്ക് ; ട്രെയിൻ സർവീസുകളിൽ മാറ്റം ; ട്രെയിനുകൾ കോട്ടയം വഴി തിരിച്ചുവിടും ; ഭാഗികമായി റദ്ദാക്കിയ ട്രെയിനുകളെ കുറിച്ചും വഴിതിരിച്ചു വിടുന്ന സർവീസുകളുടെ സമയക്രമവും അറിയാം

കൊച്ചി : കുമ്പളം റെയിൽവേ സ്റ്റേഷനിൽ ഇലക്ട്രോണിക് ഇന്റർലോക്കിങ് പാനൽ കമ്മിഷൻ ചെയ്യുന്നതിന്റെ ഭാഗമായി ഏതാനും ട്രെയിൻ സർവീസുകളിൽ മാറ്റം വരുത്തി. ഇൻഡോർ- കൊച്ചുവേളി എക്സ്പ്രസ്, ലോകമാന്യ തിലക്- തിരുവനന്തപുരം സെൻട്രൽ എക്സ്പ്രസ്, കണ്ണൂർ- ആലപ്പുഴ എക്സ്പ്രസ്, ആലപ്പുഴ- കണ്ണൂർ എക്സ്പ്രസ് തുടങ്ങിയ ട്രെയിനുകളുടെ സർവീസിലാണു മാറ്റങ്ങൾ.

വഴിതിരിച്ചു വിടുന്ന സർവീസുകൾ: ഇൻഡോർ – കൊച്ചുവേളി എക്സ്പ്രസ്: നാളെ വൈകിട്ട് 4.45ന് ഇൻഡോറിൽ നിന്നു പുറപ്പെടുന്ന ട്രെയിൻ (22645) എറണാകുളം ജംക്‌ഷൻ, ചേർത്തല, ആലപ്പുഴ, അമ്പലപ്പുഴ, ഹരിപ്പാട് സ്റ്റേഷനുകൾ ഒഴിവാക്കി കോട്ടയം വഴിയാകും സർവീസ്. പകരം എറണാകുളം ടൗൺ, കോട്ടയം, തിരുവല്ല, ചെങ്ങന്നൂർ, മാവേലിക്കര എന്നിവിടങ്ങളിലാണു സ്റ്റോപ്പുകൾ. ലോകമാന്യ തിലക്– തിരുവനന്തപുരം സെൻട്രൽ: 25നു രാവിലെ 11.40നു ലോക്മാന്യ തിലക് ടെർമിനസിൽ നിന്നു പുറപ്പെടുന്ന ട്രെയിൻ (16345) അമ്പലപ്പുഴ, ഹരിപ്പാട് സ്റ്റേഷനുകൾ ഒഴിവാക്കി കോട്ടയം വഴിയാകും സർവീസ്.

ഭാഗികമായി റദ്ദാക്കിയത്: കണ്ണൂർ-ആലപ്പുഴ എക്സ്പ്രസ്– 26നു രാവിലെ 5.10നു കണ്ണൂരിൽ നിന്നു പുറപ്പെടുന്ന ട്രെയിൻ (16308) എറണാകുളം ജംക്‌ഷനിൽ സർവീസ് നിർത്തും. ആലപ്പുഴ- കണ്ണൂർ എക്സ്പ്രസ്– 26നു വൈകിട്ട് 3.50ന് ആലപ്പുഴയിൽ നിന്നു പുറപ്പെടേണ്ട ട്രെയിൻ (16307) എറണാകുളം ജംക്‌ഷനിൽ നിന്നു വൈകിട്ട് 5.15നു സർവീസ് തുടങ്ങും. ആലപ്പുഴ-എറണാകുളം സെക്‌ഷനിൽ ഭാഗികമായി സർവീസ് റദ്ദാക്കും.