കോട്ടയം കൂരോപ്പടയിൽ വീട് കുത്തിത്തുറന്ന് വൻ കവർച്ച; 50 പവനിലധികം സ്വർണവും പണവും മോഷണം പോയി; പ്രതിക്കായി അന്വേഷണം ആരംഭിച്ച് പൊലീസ്

കോട്ടയം: പാമ്പാടി കൂരോപ്പടയിൽ വീട് കുത്തിത്തുറന്ന് 50 പവൻ ലധികം സ്വർണവും, പണവും കവർന്നു. ചെന്നാമറ്റം ഇലപ്പനാൽ ഫാദർ ജേക്കബ് നൈനാൻ്റെ വീട്ടിലാണ് വൻ കവർച്ച നടന്നത്. വീട്ടുകാർ പുറത്തേക്ക് പോയ സമയത്താണ് മോഷണം നടന്നത്.

ഇന്ന് വൈകുന്നേരം അഞ്ചരയോടെയാണ് സംഭവം. ഫാദർ ജേക്കബ് നൈനാനും, ഭാര്യയും തൃക്കോതമംഗലത്തെ
ദേവാലയത്തിലേക്ക് പോയ സമയത്തും, മറ്റു കുടുംബാംഗങ്ങൾ പുറത്തേക്ക് പോയ സമയത്തുമാണ് കവർച്ച നടന്നത്.

വീടിൻ്റെ അടുക്കള വാതിൽ തകർത്താണ് മോഷ്ടാവ് അകത്തു കടന്നത്. കവർച്ച നടത്താൻ എത്തിയവർ വീടുമുഴുവൻ മുളകുപൊടി വിതറിയിട്ടുമുണ്ട്.

പാമ്പാടി പോലീസ് സ്ഥലത്തെത്തി പരിശോധന നടത്തി. അന്വേഷണം ആരംഭിച്ചു.