വൻ നഗരങ്ങളെക്കാൾ ജീവിക്കാൻ അനുയോജ്യം കോട്ടയം എന്ന് പഠനം, ഡൽഹിയെയും മുംബൈയെയും പിന്നിലാക്കി അക്ഷര നഗരി
കോട്ടയം: ഡല്‍ഹി, മുംബൈ, ചെന്നൈ ഉള്‍പ്പെടെയുള്ള വൻ നഗരങ്ങളേക്കാള്‍ ജീവിക്കാൻ മികച്ചതും അനുയോജ്യമാണ് നമ്മുടെ കോട്ടയം. ഓക്സ്ഫഡ് ഇക്കണോമിക്സ് ഗ്ലോബല്‍ സിറ്റീസ് ഇൻഡക്സ് നടത്തിയ പഠനത്തിലാണ് ഇവ പ്രതിപാദിക്കുന്നത്.
സാമ്പത്തിക സാഹചര്യങ്ങള്‍, മനുഷ്യ മൂലധനം, ജീവിതനിലവാരം, പരിസ്‌ഥിതി, ഭരണം എന്നീ 5 മേഖലകളില്‍ പഠനം നടത്തി ഓക്സ്ഫഡ് ഇക്കണോമിക്സ് ലോകത്തിലെ 1000 നഗരങ്ങളെ ഉള്‍പ്പെടുത്തി തയ്യാറാക്കിയ സൂചികയിലാണ് അക്ഷര നഗരി മലയാളികള്‍ക്ക് അഭിമാന സ്ഥാനം സ്വന്തമാക്കിയത്.
തിരുവനന്തപുരം, തൃശൂർ, കൊച്ചി നഗരങ്ങളും കോട്ടയത്തിനൊപ്പം കേരളത്തില്‍ നിന്നും ഈ പട്ടികയില്‍ ഇടം പിടിച്ചിട്ടുണ്ട്. ജീവിത നിലവാരം എന്ന ഘടകത്തിലാണ് കേരളത്തിലെ നഗരങ്ങള്‍ ഇന്ത്യൻ നഗരങ്ങളുടെ പട്ടികയില്‍ മുന്നിലെത്തിയത്.
Whatsapp Group 1 | Whatsapp Group 2 |Telegram Group
തലസ്ഥാന നഗരിയായ ഡല്‍ഹിയും സാമ്പത്തിക തലസ്‌ഥാനമായ മുംബൈയും രാജ്യത്തിന്റെ ഐടി ആസ്ഥാനമായ ബെംഗളൂരുവും വരെ ജീവിത നിലവാര സൂചികയില്‍ തിരുവനന്തപുരത്തിനും കോട്ടയത്തിനും തൃശൂരിനും കൊച്ചിക്കും പിന്നിലാണ്.
നഗരങ്ങളിലെ സാമ്പത്തിക ആരോഗ്യ സുസ്ഥിതി, ജീവിത സൗകര്യ ലഭ്യത, കുടിയേറി പാർക്കാൻ പ്രേരിപ്പിക്കുന്ന ആകർഷകത്വം, താമസച്ചെലവ് കുറവ്, വിനോദ-സാംസ്‌കാരിക അവസരം, ഇൻ്റർനെറ്റ് സ്‌പീഡ് എന്നിവയൊക്കെ കണക്കാക്കി തയാറാക്കിയ പട്ടികയില്‍ തിരുവനന്തപുരത്തിനു ആഗോള റാങ്ക് 748, കോട്ടയം 753, തൃശൂർ 757, കൊച്ചി 765, ഡല്‍ഹി 838, ഹൈദരാബാദ്-882, ബെംഗളൂരു – 847, മുംബൈ -915.
മൊത്തം റാങ്കിങ്ങില്‍ ഡല്‍ഹിയുടെ ആഗോള സ്ഥാനം 350,ബെംഗളൂരു 411, മുംബൈ 427, കൊച്ചി 521, തൃശൂർ 550. മറ്റു കേരള നഗരങ്ങള്‍ 600നു താഴെയാണ്.
