കോട്ടയം തൃക്കോതമംഗലത്ത് ടിപ്പർ ലോറി ബൈക്കിലിടിച്ച് അപകടം; ബൈക്ക് യാത്രക്കാരൻ മരിച്ചു; ഒരാൾക്ക് പരിക്ക്

സ്വന്തം ലേഖകൻ
കോട്ടയം: തൃക്കോതമംഗലത്ത് ടിപ്പർ ലോറി ബൈക്കിലിടിച്ച് അപകടം. ബൈക്ക് യാത്രക്കാരൻ മരിച്ചു. ഒരാൾക്ക് പരിക്ക്.

മല്ലപ്പള്ളി ആനിക്കാട് നൂറുമുറിയില്‍ വീട്ടില്‍ വര്‍ഗീസ് എബ്രഹാമാണ്​ (കുഞ്ഞുമോന്‍ -50) മരിച്ചത്. ഞാലിയാകുഴിയിൽ ബാർബർ ഷോപ്പ് നടത്തുന്ന കുറുമ്പനാടം വാണിയപറമ്പിൽ വി.കെ അജീഷ് കുമാറിനെ പരിക്കുകളോടെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

ബുധനാഴ്ച ഉച്ചക്ക്​ 1.30ഓടെ തൃക്കോതമംഗലം സ്‌കൂള്‍ ജങ്​ഷനിലായിരുന്നു സംഭവം. വര്‍ഗീസും അജീഷും ബൈക്കില്‍ പുതുപ്പള്ളി ഭാഗത്തുനിന്ന്​ ഞാലിയകുഴി ഭാഗത്തേക്ക്​ പോകുന്നതിനിടെ ഓവര്‍ടേക് ചെയ്‌തെത്തിയ ലോറി ഇവരുടെ ബൈക്കില്‍ ഇടിക്കുകയായിരുന്നു.

അപകടത്തില്‍ ഗുരുതരമായി പരിക്കേറ്റ ഇരുവരെയും മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും വര്‍ഗീസിനെ രക്ഷിക്കാനായില്ല. ടിപ്പര്‍ ഡ്രൈവര്‍ രാജേഷ് കുമാറിനെതിരെ വാകത്താനം പൊലീസ് കേസെടുത്തു.

കോട്ടയം മെഡിക്കല്‍ കോളജിനു സമീപത്തെ മെഡിക്കല്‍ സ്‌റ്റോറിലെ ജീവനക്കാരനായിരുന്നു വര്‍ഗീസ്. ഭാര്യ: ബീനാ മാത്യു കൊല്ലറക്കുഴി കുടുംബാംഗം. മകള്‍: ജെസ്ലിന്‍. സംസ്‌കാരം പിന്നീട്.