കോട്ടയം: ദേശീയതലത്തില്‍ നഗരസഭകള്‍ക്കുള്ള ശുചിത്വ സര്‍വേയായ സ്വച്ഛ് സര്‍വേഷനില്‍ കോട്ടയം ജില്ലയില്‍നിന്ന് ആദ്യമായി സിംഗിള്‍ സ്റ്റാര്‍ പദവി നേടി ഈരാറ്റുപേട്ട, ഏറ്റുമാനൂർ നഗരസഭകള്‍.
തുറസായ സ്ഥലങ്ങളെ മലമൂത്ര വിസര്‍ജനരഹിത പ്രദേശങ്ങളാക്കി നിലനിര്‍ത്തിയതിലൂടെ ജില്ലയിലെ അഞ്ചു നഗരസഭകള്‍ ഒഡിഎഫ് പ്ലസ് പദവിയും നേടിയെടുത്തിട്ടുണ്ട്. ശുചിത്വ മിഷനും നഗരസഭകളും ചേർന്നുള്ള സംയുക്ത ശ്രമങ്ങള്‍ക്കൊപ്പം, ഹരിതകര്‍മസേനയുടെയും ശുചീകരണത്തൊഴിലാളികളുടെയും പ്രവർത്തന ഫലമായാണ് ഈ ഒരു നേട്ടത്തിലേക്ക് വഴിയൊരുക്കി. ചങ്ങനാശേരി നഗരസഭയിലും കുമരകത്ത് പ്രവര്‍ത്തിക്കുന്ന മൊബൈല്‍ സെപ്‌റ്റേജ് ട്രീറ്റ്‌മെന്‍റ് യൂണിറ്റിന്റെ പ്രവർത്തനവും ഈ വർഷത്തെ റാങ്കിംഗ് കഴിഞ്ഞ വർഷത്തേക്കാള്‍ മെച്ചപ്പെടുത്താന്‍ സഹായകമായി.
ഉറവിടമാലിന്യ സംസ്‌കരണ സംവിധാനങ്ങള്‍, എംസിഎഫ്, മിനി എംസിഎഫുകള്‍, ബോട്ടില്‍ ബൂത്തുകള്‍, പൊതുശൗചാലയങ്ങള്‍, ഹരിതടൗണ്‍, ഹരിതസ്ഥാപനങ്ങള്‍, ഇ-മാലിന്യശേഖരണം എന്നിവയും റാങ്കിംഗ് ഉയര്‍ത്തി. ചങ്ങനാശേരി നഗരസഭയില്‍ ജൈവമാലിന്യ സംസ്‌കരണത്തിനായി പ്രതിദിനം 30 ടണ്‍ ശേഷിയുള്ള സിഎന്‍ജി പ്ലാന്‍റ് സ്ഥാപിക്കല്‍, സാനിറ്ററി മാലിന്യങ്ങള്‍ ശാസ്ത്രീയമായി സംസ്‌കരിക്കുന്നതിനുള്ള ഡബിള്‍ ചേംബര്‍ ഇന്‍സിനറേറ്ററുകള്‍, സെപ്‌റ്റേജ് മാലിന്യങ്ങള്‍ സംസ്‌കരിക്കുന്നതിനുള്ള എഫ്‌എസ്ടിപി പദ്ധതി, ഹരിതകര്‍മസേന വഴി നഗരസഭാതലത്തില്‍ ഇ-മാലിന്യശേഖരണം മുതലായവയാണ് തുടര്‍ന്നുവരുന്ന പ്രവര്‍ത്തനങ്ങള്‍.
Whatsapp Group 1 | Whatsapp Group 2 |Telegram Group