എറണാകുളം റൂട്ടിൽ ഹൈക്കോടതി വിധിയ്ക്ക് പുല്ല് വില നൽകി പട്ടാപ്പകൽ ടാറിംങ്ങ്: ഏറ്റുമാനൂർ പട്ടിത്താനം മുതൽ വൻ ഗതാഗതക്കുരുക്ക്

സ്വന്തം ലേഖകൻ

കോട്ടയം: തിരക്കേറിയ എറണാകുളം റൂട്ടിൽ ഗതാഗതക്കുരുക്ക് അതിരൂക്ഷമാക്കി പട്ടാപ്പകൽ ടാറിംങ്ങ്. ഏറ്റുമാനൂർ പട്ടിത്താനം റൂട്ടിലാണ് പട്ടാപ്പകൽ യന്ത്രം ഉപയോഗിച്ച് ടാർ ചെയ്യുന്നത്. മുന്നറിയിപ്പ് ഒന്നും കൂടാതെ , ഗതാഗതം വഴി തിരിച്ച് വിടാതെ ടാറിംങ്ങ് ചെയ്തതോടെ ഗതാഗതക്കുരുക്കും അതിരൂക്ഷമായി. പട്ടിത്താനത്ത് നിന്നും ടാറിങ്ങ് ആരംഭിച്ചതോടെ , എം.സി റോഡിലേയ്ക്കും ഗതാഗതക്കുരുക്ക് ആരംഭിച്ചിട്ടുണ്ട്.

എറണാകുളം റൂട്ടിൽ പട്ടിത്താനം മുതലാണ് രാവിലെ ടാറിങ്ങ് ആരംഭിച്ചത്. ടാറിംങ്ങ് ഒരു ഭാഗത്ത് ചെയ്യുമ്പോൾ ആ ഭാഗത്തെ ഗതാഗതം പൂർണമായി നിരോധിക്കും. ഒരു വശത്ത് വാഹനങ്ങൾ നിർത്തിയ ശേഷം വൺവേ ഗതാഗതമാണ് ക്രമീകരിച്ചിരിക്കുന്നത്. ഇതാണ് ഗതാഗതക്കുരുക്ക് രൂക്ഷമാക്കിയിരിക്കുന്നത്.

എറണാകുളം റൂട്ടിൽ കടുത്തുരുത്തി വരെ ഇന്ന് പകൽ ടാർ ചെയ്യുന്നതിനാണ് പൊതുമരാമത്ത് വകുപ്പിൻ്റെ നീക്കം. ഇത്തരത്തിൽ ടാർ ചെയ്യുമ്പോൾ രാത്രിയിൽ മാത്രമേ ടാർ ചെയ്യാവു എന്ന് ഹൈക്കോടതി ഉത്തരവ് നിലവിലുണ്ട്. ഈ ഉത്തരവ് നിലവിലിരിക്കെയാണ് ഇപ്പോൾ ഏറ്റവും തിരക്കേറിയ എറണാകുളം റൂട്ടിൽ തന്നെ മാനദണ്ഡങ്ങൾ ഒന്നും പാലിക്കാതെ ടാറിങ്ങ് നടത്തുന്നത്.

ഏറ്റുമാനൂർ – എറണാകുളം റൂട്ടിൽ ഗതാഗത തടസം ഉണ്ടാകുന്ന സാഹചര്യത്തിൽ വാഹനങ്ങൾ വഴി തിരിച്ച് വിടുകയോ , ടാറിങ്ങ് രാത്രിയിലാക്കണമെന്നുമാണ് യാത്രക്കാരുടെ ആവശ്യം.