ദർഭപ്പുല്ലിന് പകരം ഉപയോഗശൂന്യമായ വാഴയില! കൊട്ടാരക്കര ഗണപതി ക്ഷേത്രത്തിലെ കരിപ്രസാദം നിർമ്മിച്ചത് മേൽശാന്തി വാടകയ്ക്ക് എടുത്ത വീട്ടിൽ ; തിടപ്പള്ളിയിൽ നിർമ്മിക്കേണ്ട പ്രസാദം വാടക വീട്ടിൽ വൃത്തിഹീനമായ സാ​ഹചര്യത്തിൽ നിർമ്മിച്ചതിൽ പ്രതിഷേധവുമായി ഹൈന്ദവ സംഘടനകൾ

കൊല്ലം : തിടപ്പള്ളിയിൽ നിർമ്മിക്കേണ്ട പ്രസാദം മേൽശാന്തി വാടകയ്ക്ക് എടുത്ത വീട്ടിൽ വൃത്തിഹീനമായ സാഹചര്യത്തിൽ നിർമ്മിക്കുന്നതായി കണ്ടെത്തി.

കൊട്ടാരക്കര ഗണപതി ക്ഷേത്രത്തിലെ കരിപ്രസാദമാണ് മേൽശാന്തി വാടകയ്ക്ക് എടുത്ത വീട്ടിൽ നിർമ്മിച്ചത്. അസി. ദേവസ്വം കമ്മീഷണർ സ്ഥലത്ത് എത്തി പരിശോധന നടത്തി. നിരവധി മദ്യക്കുപ്പികളും ഈ മുറിയിൽ നിന്ന് പിടിച്ചെടുത്തു.

ശുചിമുറിക്ക് സമീപം ക്ഷേത്രത്തിൽ പ്രസാദം വിതരണം ചെയ്യുന്ന ഇല കൂട്ടിയിട്ടിട്ടുണ്ട്. ഗണപതി ഹോമത്തിൽ നിന്നും ലഭിക്കുന്ന കരിപ്രസാദം കൂടുതലായി ആവശ്യമാണെങ്കിൽ തിടപ്പള്ളിയിലാണ് തയ്യാറാക്കേണ്ടത്.

ദർഭപ്പുല്ല് പോലുള്ള വസ്തുക്കൾ കരിച്ചാണ് ഇവയുണ്ടാക്കേണ്ടത്. എന്നാൽ ഉപയോ​ഗ ശൂന്യമായ വാഴയില കത്തിച്ചാണ് ഇവിടെ തയ്യാറാക്കിയിരുന്നത്. സ്ഥലത്ത് ഹൈന്ദവ സംഘടനകളുടെ പ്രതിഷേധം തുടരുകയാണ്.