കൊറോണക്കാലത്ത് പ്രതിരോധ പാഠവുമായി ഹോട്ടൽ അർക്കാഡിയ: വഴിയാത്രക്കാർക്ക് കൈ കഴുകാൻ ഹോട്ടലിന് മുന്നിൽ സാനിറ്റൈസറും വെള്ളവും ഒരുക്കി മാതൃകയാകുന്നു

സ്വന്തം ലേഖകൻ

കോട്ടയം: കൊറോണക്കാലത്ത് രോഗ പ്രതിരോധത്തിൻ്റെ പുതിയ മാതൃകയായി ഹോട്ടൽ അർക്കാഡിയ. മറ്റെല്ലാ സ്ഥാപനങ്ങൾക്കും മാതൃകയാക്കാവുന്ന രീതിയിൽ , നാടിന് നന്മയുടെ സന്ദേശം പകർന്നു നൽകിയാണ് കൊറോണക്കാലത്ത് അർക്കാഡിയ ഹോട്ടലിൻ്റെ പ്രതിരോധം. ടി.ബി റോഡിൽ കെ.എസ്.ആർ.ടിസി ബസ് സ്റ്റാൻഡിനു സമീപത്ത് ഹോട്ടലിന് മുന്നിലെ നടപ്പാതയിൽ സാനിറൈസറും , വെള്ളവും സ്ഥാപിച്ച് സംസ്ഥാന സർക്കാരിൻ്റെ ബ്രേക്ക് ദ ചെയിൻ ക്യാമ്പെയിനുമായി കൈ കോർക്കുകയാണ് ഹോട്ടൽ.

കൊറോണ പടർന്നു പിടിച്ചതിൻ്റെ ആശങ്കയിലാണ് ലോകമെല്ലാം. ഇതിനിടെയാണ് രോഗ പ്രതിരോധത്തിൻ്റെ പ്രാഥമിക ശീലങ്ങൾ വളർത്തുകയാണ് അർക്കാഡിയ ഹോട്ടൽ മാനേജ്മെൻ്റ്. നിലവിൽ കേരളത്തിൽ കൊറോണ ഭീതി പടരുമ്പോൾ സർക്കാരിനൊപ്പം പ്രതിരോധ പ്രവർത്തനങ്ങളിൽ സ്വകാര്യ മേഖലയും പങ്കാളിയാകണമെന്ന സന്ദേശമാണ് ഹോട്ടൽ നൽകുന്നത്.

കഴിഞ്ഞ ദിവസം മുതലാണ് ഹോട്ടലിന് മുന്നിൽ ഇത്തരത്തിൽ സാനിറ്റൈസറും , വെള്ളവും അടക്കമുള്ള സ്ഥാപിച്ചത്. കോട്ടയം നഗരത്തിലെത്തുന്ന നൂറ് കണക്കിന് ആളുകളാണ് ഇത് പ്രയോജനപ്പെടുത്തുന്നത്. നിലവിലെ സാഹചര്യത്തിൽ രോഗ പ്രതിരോധം എത്രത്തോളം ആവശ്യമാണെന്ന് ബോധ്യപ്പെടുത്തുന്ന ബോർഡും ഇതോടൊപ്പം സ്ഥാപിച്ചിരുന്നു. ചലച്ചിത്ര താരം കോട്ടയം പുരുഷനാണ് ഹോട്ടലിൻ്റെ ബ്രേക്ക് ദി ചെയിൻ ക്യാമ്പെയിൻ ഉദ്ഘാടനം ചെയ്തത്.

സംസ്ഥാനം നേരിട്ട അതി ഭീകരമായ പ്രളയകാലത്തും അർക്കാഡിയ ഹോട്ടൽ സാധാരണക്കാർക്ക് സഹായവുമായി രംഗത്തിറങ്ങിയിരുന്നു. പ്രളയം നേരിട്ട സാധാരണക്കാർക്ക് സഹായം നൽകിയാണ് അർക്കാഡിയ മുന്നിൽ നിന്നത്. പ്രളയം പോലെ തന്നെ നാട് മറ്റൊരു ദുരന്തം നേരിടുമ്പോഴും നാട്ടുകാർക്കൊപ്പം തോളോട് തോൾ ചേർന്ന് നിൽക്കുകയാണ് ടീം അർക്കാഡിയ.