ഉപതെരെഞ്ഞെടുപ്പ് ഫലം ; എറണാകുളം നിയമസഭാ മണ്ഡലത്തിൽ ഭൂരിപക്ഷത്തിൽ കുറവ് ഉണ്ടായതിനെത്തുടർന്ന് രാജി വെക്കാനൊരുങ്ങി കൊച്ചി മേയർ

സ്വന്തം ലേഖകൻ

കൊച്ചി: യുഡിഎഫിന്റെ ഉറച്ച കോട്ടയായ എറണാകുളം നിയമസഭാ മണ്ഡലത്തിൽ ഭൂരിപക്ഷത്തിൽ വൻ ഇടിവ് സംഭവിച്ച പശ്ചാത്തലത്തിൽ രാജി സന്നദ്ധത പ്രകടിപ്പിച്ച് കൊച്ചി മേയർ സൗമിനി ജെയിൻ. ഉപതെരെഞ്ഞെടുപ്പിൽ എറണാകുളത്ത് ഭൂരിപക്ഷം കുറഞ്ഞതിന് കാരണം കോർപ്പറേഷന്റെ വീഴ്ചയെന്ന ആരോപണം ശരിയല്ലെന്ന് സൗമിനി ജെയിൻ പ്രതികരിച്ചു. ഇക്കാര്യം ബോധ്യപ്പെടുത്താൻ ശ്രമിച്ചിട്ടുണ്ട്. പാർട്ടി പറഞ്ഞാൽ രാജി വെക്കാൻ തയ്യാറാണെന്നും സൗമിനി ജയ്ൻ തേർഡ് ഐ ന്യൂസിനോട് പറഞ്ഞതായി റിപ്പോർട്ട്.

തെരഞ്ഞെടുപ്പ് ദിനത്തിൽ കനത്ത മഴയെത്തുടർന്ന് കൊച്ചി നഗരം വെള്ളത്തിൽ മുങ്ങിയതിനെ തുടർന്ന് കോർപ്പറേഷൻ ഭരണത്തിനെതിരെ രൂക്ഷ വിമർശനമുയർന്നിരുന്നു. കോർപ്പറേഷൻ സ്വീകരിച്ച അശാസ്ത്രീയ നടപടികളാണ് കൊച്ചി നഗരത്തിലെ വെള്ളക്കെട്ടിന് കാരണമെന്നായിരുന്നു ആരോപണം. ഒട്ടേറെ ബൂത്തുകളിൽ വെള്ളം കയറി. പലർക്കും വെള്ളക്കെട്ട് കാരണം വോട്ട് ചെയ്യാൻ എത്താൻ സാധിച്ചില്ല.

എറണാകുളത്തെ പോളിംഗ് ശതമാനം അറുപത് ശതമാനം പോലും തൊട്ടിരുന്നില്ല. എന്നാൽ നിറം മകുറഞ്ഞെങ്കിൽ പോലും ഉറച്ച കോട്ടയെന്ന വിശേഷണമുള്ള മണ്ഡലമായ എറണാകുളം നിലനിർത്താൻ കഴിഞ്ഞത് യുഡിഎഫിന് ആശ്വാസം പകരുന്നു.