കൊച്ചി അന്താരാഷ്ട്ര വിമാനത്താവളത്തിൽ പ്രദർശിപ്പിച്ച തന്റെ നവരസ ഭാവങ്ങള്‍ കാണാൻ കലാമണ്ഡലം ഗോപിയെത്തി
കൊച്ചി :കൊച്ചി അന്താരാഷ്ട്ര വിമാനത്താവളത്തിലെ ബിസിനസ് ജെറ്റ് ടെർമിനലില്‍ ആണ് ഒമ്പതു രസഭാവങ്ങളുടെ സൂക്ഷ്മാംശങ്ങള്‍ തനിമ ചോരാതെ പെയിന്റിങ്ങില്‍ ആവിഷ്ക്കരിച്ച് പ്രദർശിപ്പിച്ചിരിക്കുന്നത്.തന്റെ നവരസ ഭാവങ്ങള്‍ കാണാൻ ആണ് കലാമണ്ഡലം ഗോപിയാശാൻ നേരിട്ടെത്തിയത്.
പച്ചവേഷപ്പകർപ്പില്‍ ഒമ്പതു രസഭാവങ്ങൾ പെയിന്റിങ്ങില്‍ ആവിഷ്ക്കരിച്ചാണ് സിയാലില്‍ സൂക്ഷിച്ചിട്ടുള്ളത്. ഒരുദിവസം മുഴുവനും ആശാൻ കഥകളി വേഷം ധരിച്ച്‌ സിയാലിനായി ഭാവപ്രകാശം നടത്തുകയും അവയെ വിശദമായി ഫോട്ടോഗ്രാഫുകളിലാക്കി ചിത്രകാരൻ മോപസാങ് വാലത്ത് പെയിന്റിങ്ങില്‍ ആവിഷ്ക്കരിക്കുകയായിരുന്നു.
ഒരു യാത്രാ സംവിധാനം എന്നതിലപ്പുറം വിമാനത്താവളത്തില്‍ കലാ-സാംസ്ക്കാരിക വേദിയൊരുക്കുകയാണ് സിയാലെന്ന് മാനേജിങ് ഡയറക്ടർ എസ് സുഹാസ് പറഞ്ഞു. അതിന്റെ ഭാഗമായാണ് ഇപ്പോള്‍ കലാമണ്ഡലം ഗോപിയുടെ നവരസ പെയിന്റിങ് ബിസിനസ് ജെറ്റ് ടെർമിനലില്‍ ഒരുക്കിയിട്ടുള്ളതെന്നും സുഹാസ് പറഞ്ഞു.സിയാല്‍ പോലുള്ള അഭിമാന സ്ഥാപനങ്ങള്‍ ഇത്തരം കലാ പ്രവർത്തനങ്ങള്‍ ഏറ്റെടുക്കുന്നതില്‍ സന്തോഷമുണ്ടെന്ന് കലാമണ്ഡലം ഗോപി പ്രതികരിച്ചു.
Whatsapp Group 1 | Whatsapp Group 2 |Telegram Group
പ്രോത്സാഹനമുണ്ടെങ്കില്‍ ക്ലാസിക്കല്‍ കലാരൂപങ്ങള്‍ നിലനില്‍ക്കും. ഒരോ കലാ പ്രദർശനങ്ങള്‍ക്ക് പിന്നിലും നീണ്ടകാലത്തെ പ്രയത്നം ആവശ്യമാണ്. വിമാനത്താവളങ്ങള്‍ പോലെ രാജ്യാന്തര യാത്രക്കാർ എത്തുന്ന ഒരു സ്ഥലത്ത് ഇത്തരം പ്രദർശനങ്ങളിലൂടെ കലാകാരൻമാർക്ക് നല്‍കുന്ന പിന്തുണ വലുതാണെന്നും അദ്ദേഹം കൂട്ടിച്ചേർത്തു.
പ്രോജക്‌ട് കോ.ഓർഡിനേറ്ററും കഥകളി പണ്ഡിതനുമായ ഡോ. രാജശേഖർ പി വൈക്കം, ചിത്രകാരൻ മോപ്പസാങ് വാലത്ത്, കഥകളി ഗായകൻ കോട്ടക്കല്‍ മധു, വിമാനത്താവള ഡയറക്ടർ മനു ജി, എക്സിക്യൂട്ടീവ് ഡയറക്ടർമാരായ സജി കെ ജോർജ്, ജയരാജൻ വി തുടങ്ങിയവർ സന്നിഹിതരായിരുന്നു.
