അമിതവേ​ഗതയിലെത്തിയ കാർ സ്കൂട്ടറിലിടിച്ച് യുവതിക്ക് ദാരുണാന്ത്യം; ഒപ്പമുണ്ടായിരുന്ന അഞ്ചു വയസുള്ള മകന് പരിക്കേറ്റു

സ്വന്തം ലേഖകൻ

തിരുവനന്തപുരം: കിളിമാനൂർ ഇരട്ടച്ചിറയിൽ വാഹനങ്ങൾ കൂട്ടിയിടിച്ചുണ്ടായ അപകടത്തിൽ യുവതിക്ക് ദാരുണാന്ത്യം. സംസ്ഥാനപാതയിൽ കിളിമാനൂർ ഇരട്ടച്ചിറയിൽ കാറും സ്കൂട്ടറും കൂട്ടിയിടിച്ചായിരുന്നു അപകടം. സ്കൂട്ടർ ഓടിച്ചിരുന്ന കിളിമാനൂർ പാപ്പാല സ്വദേശിനി അജില (32) ആണ് മരിച്ചത്.

അജിലയോടൊപ്പം സ്കൂട്ടറിൽ ഉണ്ടായിരുന്ന അഞ്ചു വയസുള്ള മകൻ ആര്യന് പരിക്കേറ്റു. ആര്യനെ ഗോകുലം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അജിലയുടെ മൃതദേഹവും ഗോകുലം മെഡിക്കൽ കോളേജ് ആശുപത്രിയിൽ മോർച്ചറിയിൽ സൂക്ഷിച്ചിരിക്കുകയാണ്.

കാരേറ്റിലേക്ക് പോകുന്നതിനിടെയാണ് അജിലയ്ക്ക് അപകടത്തിൽ ജീവൻ നഷ്ടമായത്. സംഭവത്തിൻ്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. അമിതവേഗതയിലായിരുന്ന കാർ നിയന്ത്രണം വിട്ട് എതിർദിശയിൽ വന്ന സ്കൂട്ടറിൽ ഇടിച്ചു കയറുകയായിരുന്നു.