അഹമ്മദാബാദ്: വിജയ് ഹസാരെ ട്രോഫി ക്രിക്കറ്റ് ടൂർണമെന്റിൽ ത്രിപുരയ്ക്കെതിരെ കേരളത്തിന് 145 റൺസിന്റെ കൂറ്റൻ ജയം. അഹമ്മദാബാദിൽ നടന്ന മത്സരത്തിൽ വിഷ്ണു വിനോദിന്റെ വെടിക്കെട്ട് സെഞ്ചുറിയും ബാബ അപരാജിതിന്റെ ഓൾറൗണ്ട് പ്രകടനവുമാണ് കേരളത്തിന് കരുത്തായത്.
ആദ്യം ബാറ്റ് ചെയ്ത കേരളം 50 ഓവറിൽ എട്ട് വിക്കറ്റ് നഷ്ടത്തിൽ 348 റൺസെടുത്തപ്പോൾ, മറുപടി ബാറ്റിംഗിനിറങ്ങിയ ത്രിപുര 36.5 ഓവറിൽ 203 റൺസിന് പുറത്തായി.
ടോസ് നഷ്ടപ്പെട്ട് ബാറ്റിംഗിനിറങ്ങിയ കേരളത്തിന് ഓപ്പണർ രോഹൻ കുന്നുമ്മലാണ് മികച്ച തുടക്കം നൽകിയത്. 92 പന്തിൽ 94 റൺസെടുത്ത രോഹന് നിർഭാഗ്യവശാൽ സെഞ്ചുറി നഷ്ടമായി. തുടർന്ന് ക്രീസിലെത്തിയ വിഷ്ണു വിനോദ് ത്രിപുര ബൗളർമാരെ കണക്കിന് പ്രഹരിച്ചു.
Whatsapp Group 1 | Whatsapp Group 2 |Telegram Group
വെറും 62 പന്തിൽ നിന്നും പുറത്താകാതെ 102 റൺസാണ് വിഷ്ണു അടിച്ചുകൂട്ടിയത്. ഒമ്പത് ഫോറുകളും ആറ് സിക്സറുകളും അടങ്ങുന്നതായിരുന്നു വിഷ്ണുവിന്റെ ഇന്നിംഗ്സ്.
മധ്യനിരയിൽ ബാബ അപരാജിത് (64), അങ്കിത് ശർമ്മ (28) എന്നിവരും കേരള സ്കോറിലേക്ക് നിർണായക സംഭാവനകൾ നൽകി. ദക്ഷിണാഫ്രിക്കൻ പര്യടനം കഴിഞ്ഞെത്തിയ സഞ്ജു സാംസൺ ഈ മത്സരത്തിൽ കളിച്ചിരുന്നില്ല.
349 റൺസ് എന്ന കൂറ്റൻ വിജയലക്ഷ്യം പിന്തുടർന്ന ത്രിപുരയ്ക്ക് ബാബ അപരാജിതിന്റെ സ്പിൻ കരുത്തിന് മുന്നിൽ മറുപടിയുണ്ടായിരുന്നില്ല. ബാറ്റിംഗിൽ തിളങ്ങിയ അപരാജിത് ബൗളിംഗിൽ അഞ്ച് വിക്കറ്റുകൾ വീഴ്ത്തി ത്രിപുരയുടെ നട്ടെല്ലൊടിച്ചു.
ത്രിപുര നിരയിൽ 67 റൺസെടുത്ത ശ്രിദം പോളിനും 40 റൺസെടുത്ത തേജസ്വി ജയ്സ്വാളിനും മാത്രമാണ് അൽപ്പമെങ്കിലും ചെറുത്തുനിൽക്കാൻ സാധിച്ചത്. വിജയ് ശങ്കർ ഉൾപ്പെടെയുള്ള പ്രമുഖ താരങ്ങൾ കേരള ബൗളിംഗിന് മുന്നിൽ പതറി.
