സ്വന്തം ലേഖിക
തിരുവനന്തപുരം: സ്ത്രീകള്‍ക്കെതിരായ അതിക്രമങ്ങള്‍ തടയുന്നതിനായി ആരംഭിച്ച കേരളാ പൊലീസിന്റെ സ്വയം പ്രതിരോധ പരിശീലന പരിപാടി ഇനി സോഷ്യല്‍ മീഡയയിലൂടെ പഠിക്കാം.
കേരളാ പൊലീസ് സോഷ്യല്‍ മീഡിയ സെല്‍ നോഡല്‍ ഓഫീസര്‍ കൂടിയായ എഡിജിപി മനോജ് എബ്രഹാമിന്‍റെ നേതൃത്വത്തിലാണ് ഈ പദ്ധതി തയാറാക്കിയിരിക്കുന്നത്.
Whatsapp Group 1 | Whatsapp Group 2 |Telegram Group
സ്ത്രീകള്‍ക്ക് ഒറ്റപ്പെട്ട അവസ്ഥയില്‍ അതിക്രമം നേരിടേണ്ടി വന്നാല്‍ എങ്ങനെ പ്രതികരിക്കാം എന്നതിനെക്കുറിച്ച്‌ കേരളാ പൊലീസ് സോഷ്യല്‍ മീഡിയ സെല്‍ തയ്യാറാക്കിയ ‘അടിതട’ എന്ന സ്വയംപ്രതിരോധ പാഠങ്ങള്‍ ഉള്‍ക്കൊളളിച്ചു കൊണ്ടുളള ട്യൂട്ടോറിയല്‍ വീഡിയോ വ്യാഴാഴ്ച കേരളാ പൊലീസിന്റെ ഔദ്യോഗിക സോഷ്യല്‍ മീഡിയ പ്ലാറ്റ്‌ഫോമുകളില്‍ റിലീസ് ചെയ്യും.
തിരുവനന്തപുരം സിറ്റിയിലെ വനിതാ സ്വയംപ്രതിരോധ സംഘത്തിലെ അംഗങ്ങളായ ജയമേരി, സുല്‍ഫത്ത്, അനീസ്ബാന്‍, അതുല്യ എന്നിവരാണ് വിഡിയോയിലൂടെ പരിശീലനം നല്‍കുന്നത്.
സ്ത്രീകള്‍ക്കെതിരായ അതിക്രമങ്ങള്‍ വര്‍ധിച്ചുവരുന്ന സാഹചര്യത്തില്‍ അത്തരം അതിക്രമങ്ങള്‍ തടയുന്നതിനായി കേരളാ പൊലീസ് നിരവധി പദ്ധതികള്‍ ആവിഷ്‌ക്കരിച്ചിട്ടുണ്ട്.
സ്വയം പ്രതിരോധം തീര്‍ക്കുന്നതിനായി കേരളാ പൊലീസ് വനിതാ സ്വയംപ്രതിരോധ സംഘത്തിന്‍റെ നേതൃത്വത്തില്‍ സ്വയം പ്രതിരോധ പരിശീലനം എല്ലാ ജില്ലകളിലും കഴിഞ്ഞ നിരവധി വര്‍ഷങ്ങളായി സൗജന്യമായി നല്‍കി വരുന്നു.
സോഷ്യല്‍ മീഡിയ സെല്ലിലെ പൊലീസ് ഉദ്യോഗസ്ഥന്‍ അരുണ്‍ ബി ടിയുടേതാണ് ട്യൂട്ടോറിയല്‍ വിഡിയോയുടെ ആശയം.
