കോട്ടയം: സംസ്ഥാനത്തെ പൊലീസ് സേനയിലെ 47 സിഐമാർക്ക് സ്ഥലം മാറ്റം. കോട്ടയം ജില്ലയിലെ നാല് സിഐമാർക്ക് ഫലത്തിൽ സ്ഥാനമാറ്റമുണ്ടായിട്ടുണ്ട്. പള്ളിക്കത്തോട്, തൃക്കൊടിത്താനം, കുമരകം സ്‌റ്റേഷനുകളിലെ സിഐമാരാണ് മാറിയിരിക്കുന്നത്.
ഇടുക്കി ക്രൈംബ്രാഞ്ചിൽ നിന്നും സാജു വർഗീസിനെ തൃക്കൊടിത്താനം പൊലീസ് സ്റ്റേഷനിലേയ്ക്ക് നിയമിച്ചിട്ടുണ്ട്. നിലവിൽ തൃക്കൊടിത്താനം സി.ഐ ആയ ടി.ആർ ജിജുവിനെ പള്ളിക്കത്തോട് പൊലീസ് സറ്റേഷനിലേയ്ക്ക് മാറ്റി നിയമിച്ചപ്പോൾ, പള്ളിക്കത്തോട് സ്‌റ്റേഷനിലെ സി.ഐ പി.ജെ നോബിളിന് എറണാകുളം റൂറലിലെ എടത്തല പൊലീസ് സ്റ്റേഷനിലേയ്ക്കാണ് നിയമനം നൽകിയിരിക്കുന്നത്. കുമരകം സ്റ്റേഷനിലെ  സി.ഐ ആയിരുന്ന ടി.എസ് ശിവകുമാറിനെ എറണാകുളം റൂറലിലെ തടിയിട്ടപറമ്പ് പൊലീസ് സ്റ്റേഷനിലേയ്ക്കാണ് നിയമിച്ചിരിക്കുന്നത്.
ജില്ലയിലെ വിവിധ സ്‌റ്റേഷനുകളിൽ ഇനിയും എസ്.എച്ച്.ഒ തസ്തികയിലേയ്ക്ക് സിഐമാർ എത്താനുണ്ട്. ഇതിനിടെയാണ് ഇപ്പോൾ സിഐമാരെ പരസ്പരം മാറ്റി നിയമിച്ചിരിക്കുന്നത്. കുമരകത്തെ സി.ഐയെ മാറ്റിയെങ്കിലും പകരം പുതിയ ആൾക്ക് നിയമനം നൽകിയിട്ടില്ല. ഇത് അടക്കം നിരവധി സ്റ്റേഷനുകളിൽ ഇനിയും പുതിയ സി.ഐമാരെ നിയമിക്കാനുണ്ട്. തിരഞ്ഞെടുപ്പ് കാലത്ത് സ്ഥലം മാറി എത്തിയ പല സിഐമാർക്കും മാതൃജില്ലയിലേയ്ക്ക് ഇനിയും മാറ്റം ലഭിച്ചിട്ടുമില്ല.