കൊച്ചി: പൊലീസ് തടഞ്ഞുവെയ്ക്കുന്ന സമയം മുതല്‍ പ്രതിയുടെ കസ്റ്റഡി സമയം ആരംഭിക്കുമെന്ന് ഹൈക്കോടതി. നടപടിക്രമങ്ങളുടെ ഭാഗമായി പൊലീസ് അറസ്റ്റ് രേഖപ്പെടുത്തുന്ന സമയം മുതലല്ല കസ്റ്റഡി ആരംഭിക്കുന്നതെന്നും ഹൈക്കോടതി വ്യക്തമാക്കി.
ഇന്ത്യയില്‍, ഒരു കുറ്റാരോപിതനെ പോലീസ് തടഞ്ഞുവെയ്ക്കുന്ന സമയം മുതല്‍ അവരുടെ കസ്റ്റഡി സമയം ആരംഭിക്കുമെന്ന് കേരള ഹൈക്കോടതി.
കസ്റ്റഡിയിലെടുത്ത് 24 മണിക്കൂറിനുള്ളില്‍ അറസ്റ്റ് രേഖപ്പെടുത്തണമെന്നും അറസ്റ്റ് രേഖപ്പെടുത്തി 24 മണിക്കൂറിനുള്ളില്‍ മജിസ്ട്രേറ്റിന് മുന്നില്‍ ഹാജരാക്കണമെന്നുമുള്ള നിര്‍ദ്ദേശത്തിലാണ് ഹൈക്കോടതി വ്യക്തത വരുത്തിയത്.
Whatsapp Group 1 | Whatsapp Group 2 |Telegram Group
ജസ്റ്റിസ് ബെച്ചു കുര്യന്‍ തോമസ് അധ്യക്ഷനായ സിംഗിള്‍ ബെഞ്ചിന്റേതാണ് നടപടി. പൊലീസ് കസ്റ്റഡിയിലെടുക്കുന്ന നിമിഷം മുതല്‍ അറസ്റ്റ് കണക്കാക്കിയില്ലെങ്കില്‍ പ്രതിയുടെ മൗലികാവകാശം ലംഘിക്കപ്പെടുമെന്ന അമികസ് ക്യൂറിയുടെ നിലപാട് അംഗീകരിച്ചാണ് ഹൈക്കോടതിയുടെ ഈ നടപടി.
അറസ്റ്റിനു ശേഷമുള്ള ആദ്യത്തെ 24 മണിക്കൂർ നിർണായകമാണ്. അന്വേഷണത്തിന് പോലീസിന് കൂടുതല്‍ സമയം ആവശ്യമുണ്ടെങ്കില്‍, പ്രതിയെ ഒരു മജിസ്ട്രേറ്റിന് മുന്നില്‍ ഹാജരാക്കണം, തുടർന്ന് മജിസ്ട്രേറ്റിന് കൂടുതല്‍ തടങ്കലില്‍ വയ്ക്കാൻ അനുമതി നല്‍കാമെന്നും ഹൈക്കോടതി പറഞ്ഞു.
പ്രാരംഭ തടങ്കല്‍ കാലയളവ് (സാധാരണയായി 15 ദിവസം) പോലീസ് കസ്റ്റഡിയിലാകാം, എന്നാല്‍ അതിനുശേഷം കൂടുതല്‍ തടങ്കല്‍ സാധാരണയായി ജുഡീഷ്യല്‍ കസ്റ്റഡിയിലാണെന്നും (ജയില്‍) കോടതി വ്യക്തമാക്കി.
