കനത്ത മഴയിൽ കാസർഗോഡ് ഉരുൾപൊട്ടൽ; ആളപായമില്ല, ഉരുൾപൊട്ടി ഒഴുകിയത് വാഴത്തോട്ടങ്ങളും കമുകിൻ തോട്ടങ്ങളുമുള്ള പറമ്പിലൂടെ, വ്യാപകമായ കൃഷി നാശമുണ്ടെന്ന് നാട്ടുകാർ

കാസർഗോഡ്: മൂന്നാംകടവ് കൂവാറയിൽ ഇന്ന് കനത്ത മഴയിൽ ഉരുൾപൊട്ടലുണ്ടായി. സംഭവത്തിൽ വ്യാപകമായ കൃഷി നാശമാണ് ഉണ്ടായതെന്ന് പ്രദേശവാസികൾ പറഞ്ഞു. വീടുകൾക്ക് കേടുപാടുകളോ ആളപായമോ ഒന്നും ഉണ്ടായിട്ടില്ലെങ്കിലും വലിയ തോതിൽ കൃഷിനാശം ഉണ്ടായിട്ടുണ്ട്.

വാഴത്തോട്ടങ്ങളും കമുകിൻ തോട്ടങ്ങളുമൊക്കെയുള്ള പറമ്പിലൂടെയാണ് ഉരുൾപൊട്ടലുണ്ടായത്. കൃഷി ആവശ്യങ്ങൾക്കായി നിർമ്മിച്ച ഇടങ്ങൾ മണ്ണും ചെളിയും നിറഞ്ഞ അവസ്ഥയിലാണ്. പ്രകൃതി ദുരന്തത്തിന്റെ ദൃശ്യങ്ങളും പുറത്തുവന്നിട്ടുണ്ട്.

നാളെ ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് എന്നീ ജില്ലകളിൽ കേന്ദ്ര കാലാവസ്ഥാ വകുപ്പ് മഞ്ഞ അലർട്ട് പ്രഖ്യാപിച്ചു. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്ററിൽ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്.

ഇന്ന് വയനാട്, കണ്ണൂർ, കാസർഗോഡ് ജില്ലകളിൽ കേന്ദ്ര കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചിട്ടുണ്ട്. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. വിവിധ തീരങ്ങളിൽ കടലാക്രമണം ശക്തമാകാൻ സാധ്യതയുള്ളതിനാൽ അപകട മേഖലകളിൽ താമസിക്കുന്നവർ ജാഗ്രത പാലിക്കണം. ആവശ്യമായ ഘട്ടത്തിൽ മാറി താമസിക്കണം.

മത്സ്യബന്ധനോപധികൾ സുരക്ഷിതമാക്കി വെക്കണം. അടച്ചുറപ്പില്ലാത്ത വീടുകളിൽ താമസിക്കുന്നവരും മേൽക്കൂര ശക്തമല്ലാത്ത വീടുകളിൽ താമസിക്കുന്നവരും വരും ദിവസങ്ങളിലെ മുന്നറിയിപ്പുകളുടെ അടിസ്ഥാനത്തിൽ സുരക്ഷയെ മുൻകരുതി മാറി താമസിക്കാൻ തയ്യാറാവേണ്ടതാണ്.

സ്വകാര്യ-പൊതു ഇടങ്ങളിൽ അപകടവസ്ഥയിൽ നിൽക്കുന്ന മരങ്ങൾ, പോസ്റ്റുകൾ, ബോർഡുകൾ തുടങ്ങിയവ സുരക്ഷിതമാക്കേണ്ടതും മരങ്ങൾ വെട്ടി ഒതുക്കുകയും ചെയ്യേണ്ടതാണ്. അപകടാവസ്ഥകൾ അധികൃതരുടെ ശ്രദ്ധയിൽ പെടുത്തേണ്ടതാണ്.