സ്വന്തം ലേഖിക
കോട്ടയം: കാരുണ്യ ആരോഗ്യ ഇന്ഷുറന്സ് വഴിയുളള ചികില്സാ സഹായം നിലച്ചതോടെ കടുത്ത പ്രതിസന്ധിയിലൂടെ കടന്നു പോവുകയാണ് കോട്ടയം മെഡിക്കല് കോളജിലെ ഡയാലിസിസ് രോഗികള്.
ജീവന് നിലനിര്ത്താനുളള ചികില്സയ്ക്കായി പലരും പ്രതിമാസം പതിനായിരം രൂപ വരെ അധികമായി കണ്ടെത്തേണ്ട നിലയിലാണിപ്പോള്. കോടിക്കണക്കിനു രൂപ സര്ക്കാര് കുടിശിക വരുത്തിയതോടെയാണ് കഴിഞ്ഞ ഏപ്രില് മുതല് ഡയലാസിസ് രോഗികള്ക്കുളള കാരുണ്യ സേവനങ്ങള് നിലച്ചത്. മന്ത്രിമാര്ക്ക് പരാതി നല്കിയിട്ടും പ്രയോജനമൊന്നുമില്ല.
Whatsapp Group 1 | Whatsapp Group 2 |Telegram Group
ഡയാലിസിസ് വാര്ഡിനു മുന്നില് ഉള്ളവര്ക്കെല്ലാം പറയാനുള്ളത് തങ്ങള് നേരിടുന്ന പ്രതിസന്ധിയെക്കുറിച്ചാണ്. കാരുണ്യ വഴിയുളള സഹായമില്ലെങ്കില് ആരോഗ്യ ഇന്ഷുറന്സിൽ എങ്കിലും ഉള്പ്പെടുത്തണമെന്നാണ് ഇവരുടെ ആവശ്യം. കാര്യം പറഞ്ഞ് മന്ത്രിമാരെ പലരെയും നേരില് കണ്ടു. കാണാന് പറ്റാത്തവരെ ഫോണില് വിളിക്കുന്നുമുണ്ട്. പക്ഷേ പ്രയോജനമില്ലെന്നു മാത്രം. ചികില്സയും ദൈനംദിന ജീവിതവും കൂടി മുന്നോട്ടു കൊണ്ടുപോകാന് കഴിയാത്ത വിധം പ്രതിസന്ധിയിലായിരിക്കുകയാണ് ഈ പാവങ്ങൾ.
