പാലക്കാട്: തൃശ്ശൂര്‍ താലൂക്കിലെ പാണഞ്ചേരി വില്ലേജില്‍ രാജീവ് ദശലക്ഷം നഗറിലെ 67 പേര്‍ക്ക് റവന്യുവകുപ്പ് മന്ത്രി കെ. രാജന്‍ പട്ടയം വിതരണം ചെയ്തു. പാണഞ്ചേരി വില്ലേജില്‍ രാജീവ് ദശലക്ഷം നഗറിലെ 42 പേര്‍ക്കും ഇരുമ്പ് പാലം നിവാസികളായ 21 പേര്‍ക്കും അതിദരിദ്രര്‍ക്കുള്ള 4 പട്ടയങ്ങളുമാണ് മന്ത്രി വിതരണം ചെയ്തത്.
അഞ്ച് വര്‍ഷം മുമ്പ് എംഎല്‍എയും ചീഫ് വിപ്പും ആയി പ്രവര്‍ത്തിച്ചിരുന്ന സമയത്ത് ഒരു കുടുംബ യോഗത്തില്‍ പങ്കെടുക്കാന്‍ വന്നപ്പോള്‍ ഇരുപത്തിയഞ്ച് വര്‍ഷമായി പട്ടയം കിട്ടാത്തതിന്റെ പ്രശ്‌നം അറിയിച്ചിരുന്നു. അന്ന് കൊടുത്ത വാക്ക് രാജീവ് ദശലക്ഷം നഗറിലെ മുഴുവന്‍ അര്‍ഹതപ്പെട്ടവരും ഭൂമിയുടെ അവകാശികളായി മാറും എന്ന് പ്രഖ്യാപിച്ച വാഗ്ദാനം അക്ഷരാര്‍ത്ഥത്തില്‍ ഇന്ന് നിറവേറിയതായും മന്ത്രി ചടങ്ങില്‍ പറഞ്ഞു.
1994ല്‍ പാണഞ്ചേരി പഞ്ചായത്ത് നിര്‍ദ്ദേശിച്ച അര്‍ഹരായ ഗുണഭോക്താക്കള്‍ക്ക് 1994ല്‍ തന്നെ ഭവന നിര്‍മ്മാണ വകുപ്പിന്റെ ഭാഗമായിട്ടുള്ള ഹൗസിംഗ് ബോര്‍ഡ് നിര്‍മ്മിച്ച് കൈമാറിയിരുന്നു. എന്നാല്‍ ആ ഗുണഭോക്താക്കള്‍ക്ക് രേഖ നല്‍കാന്‍ പറ്റിയിരുന്നില്ല. 2009 ല്‍ ഹൗസിംഗ് ബോര്‍ഡ് ഗുണഭോക്താക്കളുടെ വായ്പ പൂര്‍ണമായും എഴുതിത്തള്ളി. എങ്കിലും ഇവര്‍ക്ക് ഭൂമി പതിച്ചു നല്‍കുക എന്ന നടപടി ക്രമങ്ങളിലേക്ക് കടന്നിരുന്നില്ല.
Whatsapp Group 1 | Whatsapp Group 2 |Telegram Group
പലവിധ കാരണങ്ങളാല്‍ ഭൂമി നല്‍കാന്‍ പ്രശ്‌നങ്ങള്‍ ഉണ്ടായപ്പോള്‍ ഇത്തവണ റവന്യൂ വകുപ്പ് മന്ത്രി ആയതോടെ ‘എല്ലാവര്‍ക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാര്‍ട്ട്’ എന്ന മുഖമുദ്രാവാക്യത്തോടെ ആരംഭിച്ചതാണ് പട്ടയം മിഷന്‍. മണ്ഡലത്തിനകത്ത് ഉയര്‍ന്നുവരുന്ന പട്ടയ പ്രശ്‌നങ്ങള്‍ പൊതുവായി ചര്‍ച്ച ചെയ്യാനും 140 നിയോജക മണ്ഡലങ്ങളിലും ജില്ലയിലും തീരാത്ത പ്രശ്‌നങ്ങള്‍ ആണെങ്കില്‍ ഒരു പട്ടയ ഡാഷ്‌ബോര്‍ഡില്‍ ഉള്‍പ്പെടുത്താനും പട്ടയ ഡാഷ് ബോര്‍ഡ് മൂന്ന് മാസത്തിലൊരിക്കല്‍ പരിശോധന നടത്തിക്കൊണ്ട് അവര്‍ക്ക് ആവശ്യമായ നടപടികള്‍ എടുക്കാന്‍ കഴിയുന്ന തരത്തിലാണ് ഡാഷ് ബോര്‍ഡ് രൂപീകരിച്ചതെന്നും മന്ത്രി പറഞ്ഞു.
2011 മുതല്‍ 2016 വരെയുള്ള കാലത്ത് നമ്മുടെ ജില്ലയില്‍ ആകെ വിതരണം ചെയ്ത 77 വനഭൂമി പട്ടയങ്ങളില്‍ കേവലം 18 എണ്ണം മാത്രമാണ് ഒല്ലൂര്‍ നിയോജക മണ്ഡലത്തില്‍ വിതരണം ചെയ്തത്. എന്നാല്‍ കഴിഞ്ഞ അഞ്ചു വര്‍ഷത്തിനിടയില്‍ ഈ നിയോജക മണ്ഡലത്തില്‍ മാത്രം വനഭൂമി പട്ടയമായി വിതരണം ചെയ്തത് മൂവായിരത്തോളം പട്ടയങ്ങളാണ്. ഈ പട്ടയ മേളയില്‍ വിതരണം ചെയ്യാന്‍ 256 വനഭൂമി പട്ടയങ്ങള്‍ ഇപ്പോള്‍ തയ്യാറാണ്.
