കൊറോണയ്ക്കിടയിൽ ജമ്മു കാശ്മീരിൽ വീണ്ടും ഏറ്റുമുട്ടൽ ; രണ്ട് തീവ്രവാദികൾ ഉൾപ്പെടെ മൂന്ന് പേരെ ഇന്ത്യൻ സൈന്യം വധിച്ചു

സ്വന്തം ലേഖകൻ

ന്യൂഡൽഹി : ലോകരാജ്യങ്ങൾ കൊറോണ ഭീതിയിൽ വലയുമ്പോൾ ജമ്മുകാശ്മീരിൽ പുൽവാമയിൽ വീണ്ടും ഏറ്റുമുട്ടൽ.

ജമ്മു കാശ്മീരിലെ പുൽവാമയിൽ ഇന്ത്യൻ സൈന്യവുമായുള്ള ഏറ്റുമുട്ടലിൽ രണ്ട് തീവ്രവാദികളെ വധിച്ചു. തീവ്രവാദികൾക്കൊപ്പം, തീവ്രവാദികൾക്ക് സഹായം നൽകിയിരുന്ന ഒരാളെയും സൈന്യം വധിച്ചിട്ടുണ്ടെന്ന് വിവിധ വാർത്ത ഏജൻസികൾ റിപ്പോർട്ട് ചെയ്തു.

ശനിയാഴ്ച രാവിലെ ജമ്മു – കാശ്മീരിൽ പുൽവാമ ജില്ലയിലെ അവന്തിപ്പൊരയിൽ നടന്ന ഏറ്റുമുട്ടലിലാണ് തീവ്രവാദികളെ വധിച്ചത്. അതേസമയം ഈ മേഖലയിൽ സൈന്യവും തീവ്രവാദികളും തമ്മിലുള്ള ഏറ്റുമുട്ടൽ ഇപ്പോഴും തുടരുകയാണ്.

കഴിഞ്ഞ ദിവസം ഷോപ്പിയാൻ മേഖലയിൽ നടന്ന ഏറ്റുമുട്ടലിൽ നാല് തീവ്രവാദികളെ ഇന്ത്യൻ സൈന്യം വധിച്ചിരുന്നു. അൻസാർ ഗാസ്വാത് ഉൾ ഹിന്ദ് എന്ന സംഘടനയുടെ തീവ്രവാദികളെയാണ് ഷോപ്പിയാനിൽ കഴിഞ്ഞ ദിവസം സൈന്യം വധിച്ചത്.