കാലിഫോര്‍ണിയ: ആപ്പിള്‍ പ്രേമികള്‍ ഐഫോണ്‍ 17 സീരീസ് പുറത്തിറങ്ങുന്നതിനായി കാത്തിരിക്കുകയാണ്. സെപ്റ്റംബര്‍ മാസത്തിലാണ് നാല് സ്‌മാര്‍ട്ട്‌ഫോണ്‍ മോഡലുകള്‍ അടങ്ങുന്ന ഐഫോണ്‍ 17 പരമ്പര ആപ്പിള്‍ അവതരിപ്പിക്കുക. 2025ല്‍ ഇത് കൂടാതെ മറ്റനേകം ഡിവൈസുകളും ആപ്പിളില്‍ നിന്ന് വരാനുണ്ട്.
ആപ്പിള്‍ 2025ല്‍ 15-ലധികം പുത്തന്‍ ഗാഡ്‌ജറ്റുകള്‍ പുറത്തിറക്കും. ഐഫോണുകള്‍, മാക്‌, വിയറബിള്‍സ്, സ്മാര്ട്ട് ഹോം ടെക് എന്നിവയുള്‍പ്പടെയാണിത്. സെപ്റ്റംബറില്‍ പ്രകാശനം ചെയ്യാനിരിക്കുന്ന ഐഫോണ്‍ 17 സീരീസില്‍ ഐഫോണ്‍ 17, ഐഫോണ്‍ 17 എയര്‍, ഐഫോണ്‍ 17 പ്രോ, ഐഫോണ്‍ 17 പ്രോ മാക്സ് എന്നിവയാണുള്ളത്. ഇവയ്ക്ക് പുറമെ, അടുത്ത തലമുറ എം5 ചിപ്പില്‍ മാക്‌ബുക്ക് പ്രോയും ഈ വര്‍ഷം പുറത്തിറങ്ങും. എം5 ചിപ്പിലുള്ള മാക്‌ബുക്ക് എയര്‍ വരിക 2026-ലായിരിക്കും. എം5 ചിപ്പിലുള്ള ഐപാഡ് പ്രോയും വരാനിരിക്കുന്ന ആപ്പിള്‍ ഡിവൈസുകളിലൊന്നാണ്. ആപ്പിളിന്‍റെ സ്വന്തം സി1 മോഡം സഹിതമായിരിക്കുമിത്. എം3 അള്‍ട്രാ ചിപ്പിലുള്ള മാക്‌ പ്രോയും അവതരിപ്പിക്കും.
ആപ്പിളിന്‍റെ വിയറബിള്‍ ഡിവൈസുകളിലും അപ്ഡേറ്റ് വരാനുണ്ട്. 5ജി റെഡ്‌ക്യാപ് പിന്തുണയില്‍ ആപ്പിള്‍ വാച്ച് അള്‍ട്രാ 3 പുറത്തിറങ്ങുമെന്നതാണ് ഇതിലൊരു വാര്‍ത്ത. ഇതില്‍ ഹെപ്പര്‍ടെന്‍ഷന്‍ സെന്‍സറുകളും, സാറ്റ്‌ലൈറ്റ് ഫീച്ചറുകളുമുണ്ടാകും. അതേസമയം ആപ്പിള്‍ വാച്ച് സീരീസ് 11 നിലവിലെ ഡിസൈന്‍ പിന്തുടരുമെങ്കിലും രക്തസമ്മര്‍ദ ഡിറ്റക്ഷന്‍ ഫീച്ചര്‍ ചേര്‍ക്കും. ആപ്പിള്‍ വാച്ച് എസ്ഇ പരിഷ്‌കരിച്ച എസ്-ക്ലാസ് ചിപ്പ് മികച്ച പ്രകടനത്തിനായി ഉള്‍പ്പെടുത്തും. ഇവയ്ക്ക് പുറമെ എയര്‍പോഡ്സ് പ്രോ 3 മെച്ചപ്പെട്ട നോയിസ് കാന്‍സലേഷനും പുത്തന്‍ എച്ച്3 ചിപ്പും സഹിതം 2026-ന്‍റെ തുടക്കത്തില്‍ പുറത്തിറക്കാനും സാധ്യതയുണ്ടെന്നാണ് റിപ്പോര്‍ട്ട്.
Whatsapp Group 1 | Whatsapp Group 2 |Telegram Group
ആപ്പിള്‍ സ്മാര്ട്ട് ഹോം ഉത്പന്നങ്ങളുടെ ലൈനപ്പ് വര്‍ധിപ്പിക്കാനും ലക്ഷ്യമിടുന്നു. പുത്തന്‍ ഹോം ഓപ്പറേറ്റിംഗ് സിസ്റ്റത്തിലുള്ള പുതിയ ഹോംപാഡ് പുറത്തിറക്കും എന്നാണ് സൂചന. ഹോംപാഡ് മിനി 2-വില്‍ അപ്‌ഡേറ്റഡ് വൈ-ഫൈ മോഡം ലഭ്യമാകും. ആപ്പിള്‍ ഇന്‍റലിജന്‍സ് സാങ്കേതികവിദ്യയില്‍ ആപ്പിള്‍ ടിവി 4കെയില്‍ പരിഷ്‌കാരവും പ്രതീക്ഷിക്കാം. ഇവയ്ക്കെല്ലാം പുറമെ കൂടുതല്‍ മെച്ചപ്പെട്ട ട്രാക്കിംഗ് കൃത്യതയോടെയും വര്‍ധിപ്പിച്ച സ്വകാര്യതയോടെയും എയര്‍ടാഗ് 2 കമ്പനി പുറത്തിറക്കാനും സാധ്യതയുണ്ട്. എം5 ചിപ്പിലുള്ള വിഷന്‍ പ്രോ ഡിവൈസും ആപ്പിള്‍ വൃത്തങ്ങളില്‍ പ്രചരിക്കുന്നു. 2025-ന്‍റെ അവസാനമോ, 2026-ന്‍റെ ആദ്യമോ ആകും ഈ വിഷന്‍ പ്രോ ഡിവൈസ് വരാന്‍ സാധ്യത.
