മിണ്ടാനാവാതെ മമ്മൂട്ടി…! വിങ്ങിപ്പൊട്ടി ജയറാം; വികാരാധീനനായി ദിലീപ്; ഇന്നസെന്റിന്റെ വിയോഗത്തില്‍ ഹൃദയം തകര്‍ന്ന് സിനിമാലോകം; അതുല്യ നടന്റെ വിയോഗമറിഞ്ഞതോടെ ആശുപത്രിയിലേയ്ക്ക് ഓടിയെത്തി താരങ്ങൾ

സ്വന്തം ലേഖകൻ

കൊച്ചി: പ്രിയ നടന്‍ ഇന്നസെന്റിന്റെ വിയോഗ വാര്‍ത്ത ഉള്‍ക്കൊള്ളാനാകാതെ മലയാള സിനിമാ താരങ്ങള്‍.
നിശ്ചയദാര്‍ഢ്യത്തോടെ അര്‍ബുദത്തോട് പോരാടി ചലച്ചിത്ര ലോകത്തേയ്ക്ക് മടങ്ങിയെത്തിയ ഇന്നസെന്റിന്റെ വിയോഗ വാര്‍ത്ത പല സഹപ്രവര്‍ത്തകരെയും കണ്ണീരണിയിച്ചു.

ഇന്നസെന്റ് ദിവസങ്ങളായി ചികിത്സയില്‍ തുടര്‍ന്ന സ്വകാര്യ ആശുപത്രിയിലുണ്ടായിരുന്ന ജയറാം മരണവാര്‍ത്ത അറിഞ്ഞതോടെ നിറകണ്ണുകളോടെയാണ് മടങ്ങിയത്.

ആശുപത്രിയിലുണ്ടായിരുന്ന ദിലീപും ഇന്നസെന്റിന്റെ വിയോഗത്തോടെ വികാരാധീനനായി. അതുല്യ നടന്റെ വിയോഗമറിഞ്ഞതോടെ പല പ്രമുഖ താരങ്ങളും ആശുപത്രിയിലേയ്ക്ക് എത്തി.

മമ്മൂട്ടി, സുരാജ് വെഞ്ഞാറമൂട്, കുഞ്ചാക്കോ ബോബന്‍, ലാല്‍ എന്നീ പ്രമുഖതാരങ്ങളും ഹൃദയഭേദകമായ വാര്‍ത്ത അറിഞ്ഞതോടെ തങ്ങളുടെ സഹപ്രവര്‍ത്തകനെ ഒരു നോക്ക് കാണാനായി എത്തിച്ചേര്‍ന്നു.