അമ്മയ്ക്കും കുഞ്ഞിനും ഒരുമിച്ച് കിടക്കാൻ ഇന്ത്യയിലെ ട്രെയിനുകളിൽ ബേബി ബെർത്ത്: സാധാരണ സീറ്റിൽ മടക്കിവെയ്ക്കാവുന്ന തരത്തിലുള്ളവയാണ് ബേബി സീറ്റുകൾ

സ്വന്തം ലേഖകൻ
ലക്നൗ: ഇന്ത്യയിലെ ട്രെയിനുകളിൽ അമ്മയ്ക്കും കുഞ്ഞിനും ഒരുമിച്ച് കിടക്കാൻ പ്രത്യേക ബെർത്ത് സംവിധാനം വരുന്നു. പരീക്ഷണാടിസ്ഥാനത്തിൽ ലക്നൗ ഡിവിഷനാണ് മാതൃദിനത്തോടനുബന്ധിച്ച് തേഡ് എസി കോച്ചിൽ 2 പ്രത്യേക ബെർത്തുകൾ തയ്യാറാക്കിയത്. സാധാരണ സീറ്റിൽ മടക്കിവെയ്ക്കാവുന്ന തരത്തിലുള്ള ബേബി സീറ്റ് കൂടി ഘടിപ്പിക്കുകയാണ് ചെയ്യുന്നത്.

പരീക്ഷണം വിജയമാണെന്ന് ബോധ്യപ്പെട്ടാൽ കൂടുതൽ കോച്ചുകളിലേക്ക് ഈ സംവിധാനം വ്യാപിപ്പിക്കുമെന്ന് റെയിൽവേ അധികൃതർ വ്യക്തമാക്കി. അമ്മയ്ക്കും കുഞ്ഞിനുമുള്ള പ്രത്യേക ബെർത്ത് സംവിധാനത്തെ സ്വാഗതം ചെയ്ത് സമൂഹമാധ്യമങ്ങളിലൂടെ ഒട്ടേറെപ്പേർ രം​ഗത്തെത്തി. പദ്ധതിക്ക് മികച്ച പ്രതികരണം ലഭിച്ചാൽ എല്ലാ ട്രെയിനുകളിലും ബേബി ബെർത്തുകളൊരുക്കുമെന്നും റെയിൽവേ വ്യക്തമാക്കി.

അമ്മയ്ക്കും കുഞ്ഞിനും തന്നെ ഈ ബെർത്ത് കിട്ടാനായി റിസർവേഷൻ സംവിധാനത്തിൽ മാറ്റങ്ങൾ വരുത്തേണ്ടി വരും. വർഷങ്ങൾക്ക് മുൻപ് തൊട്ടിൽ ഒരുക്കിയിരുന്നെങ്കിലും തൊട്ടിൽ ഒരു ഭാഗത്തും അമ്മയുടെ സീറ്റ് മറ്റൊരു ഭാഗത്തുമായി വരുന്ന സംഭവങ്ങൾ ആവർത്തിച്ചതോടെ പദ്ധതി ഉപേക്ഷിക്കുകയായിരുന്നു.