കീഴടക്കാനാവാതെ കൊറോണ വൈറസ് ബാധ : ഇന്ത്യയില്‍ വൈറസ് ബാധിതരുടെ എണ്ണം അരലക്ഷത്തിലേക്ക് ; രാജ്യത്ത് ഇതുവരെ മരിച്ചത് 1694 പേര്‍
സ്വന്തം ലേഖകന്‍
ന്യൂഡല്‍ഹി: ഇന്ത്യയെ പ്രതിസന്ധിയിലാക്കി കൊറോണ വൈറസ് ബാധിതരുടെ എണ്ണം അരലക്ഷത്തിലേക്ക് അടുക്കുന്നു. കേന്ദ്ര ആരോഗ്യ മന്ത്രാലയം അല്‍പസമയം പുറത്തു വിട്ട കണക്കനുസരിച്ച് രാജ്യത്ത് ഇതുവരെ റിപ്പോര്‍ട്ട് ചെയ്തത് 49391 കൊറോണ കേസുകളാണ്.
രാജ്യത്ത് ഇതുവരെ രോഗം ബാധിച്ച് 1694 പേര്‍ ഇതുവരെ മരണപ്പെട്ടു. അതേസമയം ഇന്ത്യയില്‍ ഇതുവരെ 14183 പേര്‍ക്ക് രോഗം ഭേദമായപ്പോള്‍ 33514 പേര്‍ ഇപ്പോഴും ചികിത്സയില്‍ തുടരുകയാണ്.
Whatsapp Group 1 | Whatsapp Group 2 |Telegram Group
ഒരോ ദിവസം കഴിയും തോറും മരണനിരക്കും പുതിയ രോഗികളുടെ എണ്ണവും വര്‍ധിച്ചു വരുന്ന അവസ്ഥ ഇപ്പോഴും തുടരുകയാണ്. ഇത് ആരോഗ്യപ്രവര്‍ത്തകര്‍ക്കിടയില്‍ വലിയ ആശങ്കയാണ് സൃഷ്ടിക്കുന്നത്.
കഴിഞ്ഞ 24 മണിക്കൂറില്‍ മാത്രം 126 പേരാണ് രാജ്യത്ത് കൊവിഡ് ബാധിച്ചു മരിച്ചത്. ഇത്രയും സമയം കൊണ്ട് രാജ്യത്ത് പുതിയ 2958 കൊവിഡ് കേസുകള്‍ കൂടി റിപ്പോര്‍ട്ട് ചെയ്യുകയും ചെയ്തു.
ഇന്ത്യയിലെ ആകെ കൊവിഡ് രോഗികളില്‍ 32,000-ത്തില്‍ അധികം പേരും മഹാരാഷ്ട്ര, ഗുജറാത്ത്, ഡല്‍ഹി, തമിഴ്‌നാട് എന്നീ നാല് സംസ്ഥാനങ്ങളില്‍ നിന്നാണ്. മഹാരാഷ്ട്രയിലെ മാത്രം കൊവിഡ് രോഗികളുടെ എണ്ണം 15000-ത്തിലേക്ക് കുതിക്കുകയാണ്.
ഗുജറാത്തിലും, ഡല്‍ഹിയിലും, തമിഴ്‌നാട്ടിലും കൊവിഡ് കേസുകളുടെ എണ്ണം വര്‍ദ്ധിക്കുമ്പോള്‍ മധ്യപ്രദേശിലും ഉത്തര്‍പ്രദേശിലും ഇന്നലെ പുതിയ കേസുകളില്‍ കുറവ് രേഖപ്പെടുത്തുകയും രോഗമുക്തരുടെ എണ്ണം വര്‍ധിക്കുകയും ചെയ്തിട്ടുണ്ട്.
