ഭക്ഷണം കഴിച്ച ഉടന്‍ ഉറക്കം വരാറുണ്ടോ ? കാരണമിതാണ്, ഒഴിവാക്കാന്‍ ഇക്കാര്യങ്ങള്‍ ചെയ്യാം
സ്വന്തം ലേഖകൻ
ഭക്ഷണം കഴിച്ച ശേഷം ഉറക്കം വരുക എന്നത് പലരിലും കാണപ്പെടുന്ന ഒരു രീതിയാണ്. പ്രത്യേകിച്ച് വിശേഷ ദിവസങ്ങളില്‍ ധാരാളം ഭക്ഷണം കഴിച്ചാല്‍ നമുക്ക് കൂടുതല്‍ തളര്‍ച്ച അനുഭവപ്പെടും. ഈ അവസ്ഥയെ ഫുഡ് കോമ എന്ന് വിളിക്കാറുണ്ട്. ഈ ഉറക്കം എങ്ങനെ അല്ലെങ്കില്‍ എന്തുകൊണ്ട് വരുന്നു എന്നതിനെക്കുറിച്ച് 2000 മുതല്‍ ധാരാളം ഗവേഷണങ്ങള്‍ നടന്നിട്ടുണ്ട്.
എന്താണ് ഫുഡ് കോമ?
Whatsapp Group 1 | Whatsapp Group 2 |Telegram Group
ഭക്ഷണം കഴിച്ച് ശേഷം ഉറക്കം വരുന്നതിനെയോ ക്ഷീണം തോന്നുന്നതിനെയോ ആണ് ഫുഡ് കോമ എന്ന് പറയുന്നത് .ഉച്ചഭക്ഷണത്തിന് ശേഷം പലര്‍ക്കും ഫുഡ് കോമ അനുഭവപ്പെടാറുണ്ട്. ഉറക്കമില്ലായ്മ, അലസത, ശാരീരിക ക്ഷീണം, താഴ്ന്ന ഊര്‍ജ്ജ നില, ശ്രദ്ധ കേന്ദ്രീകരിക്കാനുള്ള കഴിവില്ലായ്മ തുടങ്ങിയവയൊക്കെ ഇതിന്റെ ഭാഗമായി അനുഭവപ്പെടാം. ഇതിനെ ഭക്ഷണത്തിനു ശേഷമുള്ള മയക്കം എന്നും പറയാറുണ്ട്.
ഇതിനുള്ള കാരണങ്ങള്‍ എന്തൊക്കെയാണ്?
ഫുഡ് കോമയെക്കുറിച്ച് കൂടുതല്‍ ഗവേഷണങ്ങള്‍ നടന്നിട്ടില്ലെങ്കിലും ചില കാരണങ്ങള്‍ ഇതുമായി ബന്ധപ്പെടുത്തി പറയാറുണ്ട്. രക്തചംക്രമണത്തിലെ മാറ്റങ്ങള്‍ അതിലൊന്നാണ്. ഉച്ചഭക്ഷണത്തിന് ശേഷം നമ്മുടെ തലച്ചോറിലെ രക്തയോട്ടം കുറയുന്നതായി ഗവേഷണങ്ങള്‍ കണ്ടെത്തിയിട്ടുണ്ട്. പ്രഭാതഭക്ഷണം കഴിക്കാത്തവരിലാണ് കൂടുതലായി ഇത് കണ്ടുവരുന്നത്. അമിത ഭക്ഷണമാണ് മറ്റൊരു കാരണം. അമിതമായി ഭക്ഷണം കഴിച്ചതിന് ശേഷവും ആളുകളില്‍ ഫുഡ് കോമ അനുഭവപ്പെടാറുണ്ട്. അമിതമായി ഭക്ഷണം കഴിച്ചാല്‍ ഓക്കാനം അനുഭവപ്പെടാം.
പിസ കഴിക്കുന്ന പുരുഷന്മാരില്‍ നടത്തിയ ഗവേഷണത്തില്‍, കൂടുതല്‍ ഭക്ഷണം കഴിച്ചവരില്‍, 4 മണിക്കൂറോളം ഊര്‍ജ കുറവ്, ശാരീരിക ക്ഷീണം, ഉറക്കം, ആലസ്യം എന്നിവ കാണപ്പെടുന്നതായി കണ്ടെത്തി. ഇത് കൂടാതെ കൂടുതല്‍ കാര്‍ബോഹൈഡ്രേറ്റ്, കൊഴുപ്പ് , പ്രോട്ടീന്‍ എന്നിവ അടങ്ങിയ ഭക്ഷണം, ഉറക്ക ഹോര്‍മോണുകളിലെ വ്യത്യാസം എന്നിവയും ഫുഡ് കോമയ്ക്ക് കാരണമായേക്കാം
ഫുഡ് കോമ എത്ര നേരം നിലനില്‍ക്കും?
ഹെല്‍ത്ത് ലൈന്‍ റിപ്പോര്‍ട്ട് ചെയ്യുന്നതനുസരിച്ച് ഫുഡ് കോമ എത്രനേരം നീണ്ടുനില്‍ക്കുമെന്ന് ഒരു ഗവേഷണവും പ്രത്യേകം പരിശോധിച്ചിട്ടില്ല. എന്നിരുന്നാലും, അമിതമായി ഭക്ഷണം കഴിച്ചതിന് ശേഷമുളള ഈ ഫുഡ് കോമ 4 മണിക്കൂര്‍ വരെ നീണ്ടുനില്‍ക്കും എന്നാണ് ചില ഗവേഷണങ്ങള്‍ സൂചിപ്പിക്കുന്നത്. ഇത് പ്രകാരം ഭക്ഷണം കഴിച്ച് ഏതാനും മണിക്കൂറുകളോളം നിങ്ങള്‍ക്ക് ക്ഷീണം അനുഭവപ്പെടാം.
ഫുഡ് കോമ ദോഷകരമാണോ?
ഫുഡ് കോമയുടെ യഥാര്‍ത്ഥ കാരണം എന്താണെന്ന് ശാസ്ത്രജ്ഞര്‍ക്ക് ഇതുവരെ പൂര്‍ണ്ണമായി മനസ്സിലായിട്ടില്ല. അത്തരമൊരു സാഹചര്യത്തില്‍, ഭക്ഷണം കഴിച്ചതിനുശേഷം അല്‍പ്പം ക്ഷീണം അനുഭവപ്പെടുന്നത് സാധാരണമാണെന്നാണ് വിലയിരുത്തുന്നത്. എന്നിരുന്നാലും, ചില സാഹചര്യങ്ങളില്‍ ഈ ക്ഷീണം അപകടകരമാകും. പ്രത്യേകിച്ച് ജോലി ചെയ്യുമ്പോഴോ പഠിക്കുമ്പോഴോ അത് അസൗകര്യമുണ്ടാക്കും. വാഹനമോടിക്കുമ്പോഴും മറ്റും ഇത് അപകടകങ്ങളുമുണ്ടാക്കാം. അത്തരമൊരു സാഹചര്യത്തില്‍ കൈക്കൊള്ളേണ്ട ചില കാര്യങ്ങള്‍ ഇവയാണ്.
1. അമിതമായി ഭക്ഷണം കഴിക്കരുത്.സമീകൃതാഹാരം കഴിക്കുക.
2. മദ്യത്തിന്റെ ഉപയോഗം കുറയ്ക്കുക. മദ്യം രാത്രിയിലെ ഉറക്കത്തെ തടസ്സപ്പെടുത്തും. ഇത് പകല്‍ ക്ഷീണത്തിന് കാരണമാകും. ഭക്ഷണത്തോടൊപ്പം മദ്യം കഴിച്ചാലും മയക്കം അനുഭവപ്പെടാം.
3. നിര്‍ജ്ജലീകരണം ക്ഷീണം ഉണ്ടാക്കുകയും തലച്ചോറിന്റെ പ്രവര്‍ത്തനത്തെ തടസ്സപ്പെടുത്തുകയും ചെയ്യും. അതു കൊണ്ട് വെള്ളം, ചായ, ജ്യൂസ് തുടങ്ങിയവയൊക്കെ ധാരാളം കുടിക്കുക.
4. രാത്രിയില്‍ നന്നായി ഉറങ്ങുക.എല്ലാ ദിവസവും 7-8 മണിക്കൂര്‍ ഉറങ്ങാന്‍ ശ്രമിക്കുക.
