വിദേശത്തേക്ക്​ പണം കടത്തുന്നവരിൽ കേരളത്തിലെ​ ഹാരിസൺസും; കോടികൾ ഒഴുകുന്നത് ബ്രിട്ടനിലെ ചാനൽ ഐലൻറിലെ ബാങ്കുകളിലേക്ക്; കമ്പനിയുടെ വാർഷിക റിപ്പോർട്ടുകൾ ​തെളിവാകുന്നു

സ്വന്തം ലേഖിക

പത്തനംതിട്ട: വിദേശത്തേക്ക്​ പണം കടത്തുന്നവരിൽ കേരളത്തിലെ​ ഹാരിസൺസ്​ മലയാളം ലിമിറ്റഡ്​ കമ്പനിയും.

കള്ളപ്പണ നിക്ഷേപകരുടെ പറുദീസകളിലൊന്നായ ബ്രിട്ടനിലെ ചാനൽ ഐലൻറിലെ ബാങ്കുകളിലേക്കാണ്​ ഹാരിസൺസ്​ മലയാളം കമ്പനിയിൽ നിന്ന്​ കോടികൾ ഒഴുകുന്നത്​. കമ്പനിയുടെ വാർഷിക റിപ്പോർട്ടുകൾ ഇതിന്​ തെളിവാകുന്നു.

ഇക്കാര്യം ഹാരിസൺസ്​ ഭൂമി ഏറ്റെടുക്കുന്നതിന്​ നിയോഗിച്ച സ്​പെഷ്യൽ ഓഫിസർ എം.ജി. രാജമാണിക്യം 2016 സെപ്​റ്റംബർ 24ന് സർക്കാറിന് സമർപ്പിച്ച റിപ്പോർട്ടിൽ ചൂണ്ടികാട്ടിയിരുന്നു. ഹാരിസൺസിന്‍റെ ഉടമയായ ഗോയങ്ക ബ്രിട്ടനിലെ ചാനൽ ഐലൻഡിലേക്ക് പണംകടത്തുന്നുവെന്നാണ്​ റിപ്പോർട്ടിൽ രാജമാണിക്യം സൂചിപ്പിച്ചത്​. ഇതുസംബന്ധിച്ച് സി.ബി.ഐ, എൻഫോഴ്സ്​മെൻറ് ഡയറക്ടറേറ്റ് എന്നിവയുടെ അന്വേഷണം വേണമെന്നും രാജമാണിക്യം ശിപാർശ ചെയ്​തെങ്കിലും റിപ്പോർട്ട് സംസ്​ഥാന സർക്കാർ പൂഴ്ത്തി.

ബ്രിട്ടീഷ്​ കമ്പനിയായ മലയാളം പ്ലാ​ൻ്റെഷൻസിന്‍റെ പിൻഗാമികളാണെന്നാണ് ഹാരിസൺസ്​ അവകാശപ്പെടുന്നത്​ ​. മലയാളം പ്ലാൻ്റേഷൻസിന്​ ഹാരിസൺസിൽ 2017 ഫെബ്രുവരി വരെ 19.72 ശതമാനം ഓഹരി പങ്കാളിത്തം ഉണ്ടായിരുന്നു. അതെ ചൊല്ലി വിവാദങ്ങളും കേസുമായതോടെ കഴിഞ്ഞ ഒാഹരി പങ്കാളിത്തം ഒഴിഞ്ഞു എന്ന്​ വരുത്തി​​.

മലയാളം പ്ലാൻ്റേഷൻസിന്‍റെ (ഹോൾഡിംങ്​ – യു.കെ​) 2015 – 2016 വർഷത്തെ വാർഷിക റിപ്പോർട്ടിൽ പറയുന്നത്​ അവരുടെ എല്ലാ സ്​ഥാവര വസ്​തുക്കളും ഇന്ത്യയിലെ ഹാരിസൺസ്​ മലയാളം, സെസ്​ക്​, സെൻറിനൽ ടീ ലിമിറ്റഡ്​ എന്നിവയുടെ പക്കലാണെന്നാണ്​. ഇതു ശരിവക്കുന്നതാണ്​ ഹാരിസൺസിന്‍റെ 2015 –16 വർഷത്തെ വാർഷിക റിപ്പോർട്ട്​.

അതിൽ പറയുന്നത് തങ്ങൾക്ക് ആസ്​തി വകയായി ആകെ ഉള്ളത് 31 ലക്ഷം രൂപയുടെ സ്വത്തുക്കൾ മാത്രമാണെന്നും ഭൂമി അടക്കം ബാക്കി സ്വത്തുക്കൾ മുഴുവൻ ബ്രട്ടീഷ് കമ്പനിയായ മലയാളം പ്ലാൻ്റേഷൻസിൻ്റേതാണെന്നുമാണ്. എച്ച്.എം.എൽ, സെൻറിനൽ ടീ ലിമിറ്റഡ്, ​െ​സസ്​​ക് എന്നിവയിൽ മലയാളം പ്ലാൻ്റേഷൻസിന് 19.72 ശതമാനം ഓഹരികളാണുണ്ടായിരുന്നത്​.

2015 സെപ്റ്റംബർ 19ന് ഈ മൂന്നു കമ്പനികളിലെയും ഓഹരി ഇന്ത്യൻ കമ്പനിയായ റെയിൻബോ ഇൻവെസ്​റ്റ്മെൻറ്സ് ​ലിമിറ്റഡിന് വിൽക്കുന്നതായി കാട്ടി സെക്യൂരിറ്റീസ്​ ആൻഡ് എക്സ്​ഞ്ചേഞ്ച് ബോർഡ് ഓഫ് ഇന്ത്യക്ക് അറിയിപ്പ് നൽകിയിരുന്നു. റെയിൻബോ ഇൻവെസ്​റ്റ്മെൻറ്സ്​ ലിമിറ്റഡ് ഷെയർമാർക്കറ്റിൽ ലിസ്​റ്റ് ചെയ്ത കമ്പനിയല്ല. അതിനാൽ റെയിൻബോയുടെ ഓഹരി പങ്കാളികൾ ആരെല്ലാമെന്ന് വ്യക്തമല്ല. ഇതോടെ ബ്രിട്ടീഷ്​ ബന്ധം ഹാരിസൺസിന്​ രഹസ്യമാക്കാനും കഴിഞ്ഞു.

മലയാളം പ്ലാന്‍റേഷൻസിന്‍റെ (ഹോൾഡിംങ് ) 100 ശതമാനം ഓഹരികളും ആമ്പിൾഡൗൺ എന്ന ബ്രിട്ടീഷ് കമ്പനിയുടേതാണ്. ആമ്പിൾഡൗണിന്‍റെ 100 ശതമാനം ഓഹരികളുടെയും ഉടമ ആന്തണി ജാക്​ ഗിന്നസ്​ എന്ന ഓസ്​ട്രേലിയൻ പൗരനാണ്​. ആമ്പിൾഡൗൺ നികുതി രഹിത നിക്ഷേപകരുടെ പറുദീസയെന്നറിയപ്പെടുന്ന ചാനൽ ഐലൻഡിൽ രജിസ്​റ്റർ ചെയ്ത കമ്പനിയാണ്.

ഹാരിസൺ മലയാളം ലിമിറ്റഡ് കമ്പനിയുമായി ബന്ധപ്പെട്ട കേസില്‍ നടക്കുന്നത് സര്‍ക്കാരും കമ്പനിയും തമിലുള്ള ഒത്തുകളിയാണ്.