ഗുരുവായൂർ ക്ഷേത്ര തീർത്ഥക്കുളത്തില് റീല്സ് ചിത്രീകരിച്ച സോഷ്യല് മീഡിയ ഇൻഫ്ളുവൻസർ ജാസ്മിൻ ജാഫറിനെതിരെ പൊലീസില് പരാതി. ഗുരുവായൂർ ദേവസ്വം അഡ്മിനിസ്ട്രേറ്ററാണ് പരാതി നല്കിയത്. വിലക്ക് മറികടന്ന് ഗുരുവായൂർ തീർത്ഥക്കുളത്തില് കാല് കഴുകി റീല്സ് ചിത്രീകരിച്ചെന്നാണ് പരാതിയില് പറയുന്നത്. പൊലീസിന് ലഭിച്ച പരാതി കോടതിക്ക് കൈമാറിയതായാണ് പുറത്ത് വരുന്ന വിവരം.
വീഡിയോ ചിത്രീകരിക്കുന്നതിന് ഹൈക്കോടതി നിരോധനമേർപ്പെടുത്തിയ നടപ്പുരയിലും റീല്സ് ചിത്രീകരിച്ചെന്ന് പരാതിയില് പറയുന്നുണ്ട്. ഗുരുവായൂർ ക്ഷേത്രത്തില് അഹിന്ദു പ്രവേശനത്തിന് വിലക്കുണ്ട്. ഇത് മറികടന്നാണ് ദൃശ്യം ചിത്രീകരിച്ചത്. മതവികാരം വ്രണപ്പെടുത്തിയെന്നും കലാപാഹ്വാനം ഉയർത്തിക്കൊണ്ടുള്ള നടപടിയാണ് ഉണ്ടായതെന്നും പരാതിയിലുണ്ട്.
