കെവിനു സമാനമായ തട്ടിക്കൊണ്ടു പോകൽ: യുവാവിനെ തട്ടിക്കൊണ്ടു പോയ കഞ്ചാവ് വിൽപ്പന സംഘത്തിലെ പ്രധാനി പിടിയിൽ: പ്രതിയെ പിടികൂടിയത് തിരുവല്ലയിൽ നിന്നും

തേർഡ് ഐ ബ്യൂറോ

കോട്ടയം: കെവിൻ കേസിനു സമാനമായ രീതിയിൽ കഞ്ചാവ് വിൽപ്പന സംഘം യുവാവിനെ തട്ടിക്കൊണ്ടുപോയ കേസ്സിലെ മുഖ്യ പ്രതി പിടിയിൽ. വെള്ളൂർ ഇറുമ്പയം ഇഞ്ചിക്കാലായിൽ ജോബിൻ ജോസിനെ (24)യാണു ബുധനാഴ്ച രാത്രി ഒമ്പതരയോടെ കോട്ടയം മെഡിക്കൽ കോളേജ് ആശുപത്രി പരിസരത്തു നിന്നും ഗുണ്ടാ മാഫിയ സംഘം തട്ടിക്കൊണ്ടു പോയത്. സംഭവത്തിൻ്റെ മുഖ്യ സൂത്രധാരനെയാണ് ഇപ്പോൾ പൊലീസ് പിടികൂടിയത്.

തിരുവല്ല ഇരവിപേരൂർ കാവുംമുറി ഭാഗത്തുള്ള പുത്തൻപറമ്പിൽ വിനീതിനെയാണ് (24) ഗാന്ധിനഗർ പൊലീസ് അറസ്റ്റ് ചെയ്‌തത്. തിരുവല്ല ഇരുവിപ്പേരൂർ ഭാഗത്തുള്ള ഒളി സങ്കേതത്തിൽ നിന്നും ഗാന്ധിനഗർ പൊലീസ് സാഹസികമായി പിടികൂടി, കൂടെ ഉണ്ടായിരുന്ന മറ്റു പ്രതികൾ ഓടി ഒളിച്ചു. ഈ സംഭവത്തിൻ്റെ മുഖ്യ സൂത്രധാരനായ കോയിപ്പുറം തിരുവല്ല തുടങ്ങിയ പൊലീസ് സ്റ്റേഷനുകളിൽ ഇയാൾക്കെതിരെ കേസുകൾ ഉള്ളതായി ഗാന്ധിനഗർ പൊലീസ് അറിയിച്ചു.

തിരുവല്ല പൊലീസ് സ്റ്റേഷനിൽ പൊലീസിനെ ആക്രമിച്ച കേസിൽ പ്രതിയാണ് ഇയാൾ. കോട്ടയം ഡിവൈ.എസ്.പി എം അനിൽ കുമാറിന്റെ നിര്‍ദ്ദേശ പ്രകാരം ഗാന്ധിനഗർ സ്റ്റേഷൻ ഹൗസ് ഓഫിസർ സുരേഷ് വി നായർ , എസ്.ഐ. മാരായ സജിമോൻ ടി കെ , സജി എം പി , എ.എസ്.ഐ. മനോജ് , സീനിയർ സി.പി.ഓ ഷൈജു കുരുവിള , സി.പി.ഓ മാരായ രാഗേഷ്, അനീഷ് , പ്രവിനോ എന്നിവർ അടങ്ങിയ സംഘമാണ് പ്രതിയെ പിടികൂടിയത്. മറ്റു പ്രതികൾക്ക് വേണ്ടി പത്തനംതിട്ട , കോട്ടയം ജില്ലകളിൽ അന്വേഷണം ഊർജ്ജിതമാക്കി .

കഞ്ചാവ് നൽകാൻ പണം വാങ്ങിയ ശേഷം അക്രമി സംഘത്തെ കരിയിലയും ചപ്പും ചവറും നൽകിയ പറ്റിച്ചതിന്റെ വൈരാഗ്യത്തിനാണ് ഗുണ്ടാ സംഘം യുവാവിനെ തട്ടിക്കൊണ്ടു പോയത്.നേരത്തെ കേസിലെ പ്രതികളായ പത്തനംതിട്ട കോയിപ്രം ദ്വാരകയിൽ ലിബിൻ (28), കോയിപ്രം മോളിക്കൽ ചരിവുകാലായിൽ രതീഷ് (26) എന്നിവരെ പിടികൂടിയിരുന്നു.