കോവിഡ് ആനുകൂല്യത്തോടെ പരോളില്‍ ഇറങ്ങിയ കൊലക്കേസ് പ്രതി കഞ്ചാവുമായി പൊലീസ് പിടിയിൽ
സ്വന്തം ലേഖിക
മാവേലിക്കര: പരോളില്‍ കഴിയുകയായിരുന്ന കൊലക്കേസ് പ്രതിയെ ഒന്നേകാല്‍ കിലോ കഞ്ചാവുമായി പൊലീസ് പിടികൂടി.
2015 ലെ ഡെസ്റ്റമണ്‍ വധക്കേസില്‍, ജീവപര്യന്തം ശിക്ഷിക്കപ്പെട്ട് തിരുവനന്തപുരം സെന്‍ട്രല്‍ ജയിലില്‍ കഴിഞ്ഞുവരവെയാണ് ഇയാള്‍ കോവിഡ് ആനുകൂല്യത്തോടെ പരോളില്‍ ഇറങ്ങിയത്.
Whatsapp Group 1 | Whatsapp Group 2 |Telegram Group
വെട്ടിയാര്‍ കല്ലിമേല്‍ വരിക്കോലേത്ത് എബനേസര്‍ വീട്ടില്‍ റോബിന്‍ ഡേവിഡിനെയാണ് (30) സംഭവത്തില്‍ പൊലീസ് അറസ്റ്റ് ചെയ്തത്.
ചൊവ്വാഴ്ച വൈകിട്ട് നാലരക്ക് അറുനൂറ്റിമംഗലം മൂലേപ്പള്ളിക്ക് സമീപമുള്ള ഒളിത്താവളത്തില്‍ നിന്നും ഇയാളെ മാവേലിക്കര പൊലീസ് ഒന്നേകാല്‍ കിലോ കഞ്ചാവുമായി അറസ്റ്റ് ചെയ്യുകയായിരുന്നു.
പരോളില്‍ കഴിഞ്ഞു വരവേ തന്നെ 2021 ഒക്ടോബര്‍ 13 ന് അയല്‍വാസിയെ മര്‍ദ്ദിച്ച കേസില്‍, ഇയാള്‍ ഒളിവില്‍ പോയതോടെ പരോള്‍ റദ്ദ് ചെയ്യാന്‍ പൊലീസ് ജയില്‍ അധികൃതര്‍ക്ക് റിപ്പോര്‍ട്ട് നല്‍കിയിരുന്നു.
ചെങ്ങന്നൂര്‍ ഡി.വൈ.എസ്.പി ഡോ. ആര്‍. ജോസിന്റെ നേതൃത്വത്തില്‍, ഗുണ്ടകള്‍ക്കെതിരെ പൊലീസ് നടപടികള്‍ ശക്തമാക്കിയതിന്റെ ഭാഗമായാണ് അറസ്റ്റ് നടന്നത്. മാവേലിക്കര സി.ഐ സി. ശ്രീജിത്തിന്റെ നേതൃത്വത്തിലുള്ള സംഘം റോബിനും സുഹൃത്തുക്കളും ഒളിവില്‍ കഴിഞ്ഞുവന്ന വീട്ടില്‍ നടത്തിയ പരിശോധനയിലാണ് കഞ്ചാവ് കണ്ടെടുത്തത്.
