‘കൈയ്യും കാലും കെട്ടിയിട്ട് മർദ്ദിച്ചു’; ആര്യങ്കാവ് ഫോറസ്റ്റ് സ്റ്റേഷനിൽ യുവാവിന് ക്രൂരമർദ്ദനമെന്ന് പരാതി.വനത്തിനുള്ളിൽ അനധികൃതമായി കടന്നെന്ന് പറഞ്ഞായിരുന്നു വാഹനം തടഞ്ഞത്. റെയിഞ്ച് ഓഫീസർ ജിൻസിൻ്റെ നേതൃത്വത്തിലുള്ള സംഘമാണ് മർദ്ദിച്ചതെന്നും സന്ദീപ് പറഞ്ഞു. മുഖത്തും വായിലും പരിക്കേറ്റ സന്ദീപിനെ നാട്ടുകാർ പുനലൂർ താലൂക്ക് ആശുപത്രിയിൽ പ്രവേശിപ്പിച്ചു.

ആര്യങ്കാവിൽ ഫോറസ്റ്റ് ഡെപ്യൂട്ടി റേഞ്ച് ഓഫീസറുടെ നേതൃത്വത്തിൽ യുവാവിനെ ക്രൂരമായി മർദ്ദിച്ചതായി പരാതി. ആര്യങ്കാവ് സ്വദേശി സന്ദീപിനാണ് മർദ്ദനമേറ്റത്. സെല്ലിനുള്ളിൽ രക്തമൊലിപ്പിച്ച് നിൽക്കുന്ന സന്ദീപിൻ്റെ ദൃശ്യങ്ങൾ പുറത്തു വന്നിരുന്നു. ചന്ദന മോഷണം ആരോപിച്ചായിരുന്നു മർദ്ദനമെന്ന് സന്ദീപ് പറഞ്ഞു.

ആര്യങ്കാവ് കടമാൻ പാറയിലുള്ള സന്ദീപിന്റെ കൃഷി സ്ഥലത്തേക്ക് പോയിട്ട് തിരികെ വരുമ്പോൽ സന്ദീപ് സഞ്ചരിച്ചിരുന്ന വാഹനം ഫോറസ്റ്റ് ഉദ്യോഗസ്ഥർ തടഞ്ഞു. വനത്തിനുള്ളിൽ അനധികൃതമായി കടന്നെന്ന് പറഞ്ഞായിരുന്നു വാഹനം തടഞ്ഞത്. എന്നാൽ വനത്തിന് സമീപം ഭൂമിയുള്ള വിവരം ഫോറസ്റ്റ് ഉദ്യോഗസ്ഥരെ അറിയിച്ചെങ്കിലും ചന്ദന മോഷണം ആരോപിച്ച് കസ്റ്റഡിയിലെടുത്തതായും സന്ദീപ് പറഞ്ഞു. പിന്നീട് കടമാൻപാറ ഫോറസ്റ്റ് ഓഫീസിൽ എത്തിച്ച് കയ്യും കാലും കെട്ടിയിട്ട് മർദ്ദിച്ചതായി സന്ദീപ് പറയുന്നു.

റെയിഞ്ച് ഓഫീസർ ജിൻസിൻ്റെ നേതൃത്വത്തിലുള്ള സംഘമാണ് മർദ്ദിച്ചതെന്നും സന്ദീപ് പറഞ്ഞു. മുഖത്തും വായിലും പരിക്കേറ്റ സന്ദീപിനെ നാട്ടുകാർ പുനലൂർ താലൂക്ക് ആശുപത്രിയിൽ പ്രവേശിപ്പിച്ചു. അതേ സമയം ഫോറസ്റ്റ് സ്‌റ്റേഷനിലെത്തി സന്ദീപ് അങ്ങോട്ട് പ്രശ്നമുണ്ടാക്കുകയായിരുന്നുവെന്നാണ് ഫോറസ്റ്റ് അധികൃതരുടെ ആദ്യ വിശദീകരണം. സ്റ്റേഷനിലെ ഉദ്യോഗസ്ഥരെ മർദ്ദിച്ചതായും ഫോറസ്റ്റ് അധികൃതർ പറഞ്ഞു