ഓണപ്പരീക്ഷ 16 മുതല്‍ 24 വരെ; 26ന് സ്‌കൂളുകള്‍ അടക്കും

സ്വന്തം ലേഖകൻ

തിരുവനന്തപുരം: സംസ്ഥാനത്തെ പൊതുവിദ്യാലയങ്ങളിലെ ഓണപ്പരീക്ഷാ തീയതി പുറത്തുവിട്ടു. ഓഗസ്റ്റ് 16 മുതൽ 24 വരെയാണ് ഓണപ്പരീക്ഷകൾ നടക്കുക. യുപി, ഹൈസ്കൂൾ, ഹയർസെക്കൻഡറി വിഭാഗം പരീക്ഷകൾ ഓഗസ്റ്റ് 16-ന് ആരംഭിക്കുന്നതാണ്.

അതേസമയം, എൽപി വിഭാഗത്തിലെ പരീക്ഷകൾ 19 മുതലാണ് ആരംഭിക്കുക. മുഴുവൻ പരീക്ഷകളും ഓഗസ്റ്റ് 24-ന് തന്നെ അവസാനിക്കുന്നതാണ്. ഓഗസ്റ്റ് 25-നാണ് വിദ്യാലയങ്ങളിൽ ഓണാഘോഷ പരിപാടികൾ തീരുമാനിച്ചിരിക്കുന്നത്. ഓണാവധിക്കായി 26ന് സ്കൂളുകൾ അടയ്ക്കും. അവധി കഴിഞ്ഞ് സെപ്റ്റംബർ 4-നാണ് സ്കൂളുകൾ തുറന്ന് പ്രവർത്തിക്കുക.

പൊതു വിദ്യാഭ്യാസ ഡയറക്ടർ എസ്. ഷാനവാസിന്റെ അധ്യക്ഷതയിൽ ചേർന്ന ക്യു.ഐ.പി മോണിറ്ററിംഗ് കമ്മിറ്റിയുടേതാണ് തീരുമാനം.

അതേസമയം, ദിവസ വേതനാ അടിസ്ഥാനത്തിൽ ജോലി ചെയ്യുന്ന അധ്യാപകർക്ക് ശമ്പളം ലഭ്യമാക്കുന്നതിന് അടിയന്തര ക്രമീകരണങ്ങൾ ഒരുക്കാനും യോഗം തീരുമാനിച്ചിട്ടുണ്ട്.