കോട്ടയം ജനറൽ ആശുപത്രിക്ക് മുന്നിൽ പ്രവർത്തിക്കുന്ന സ്വീറ്റ് സ്റ്റോർ ബേക്കറിയിൽ തീപിടുത്തം..! ഷോർട്ട് സർക്യൂട്ടിനെ തുടർന്നാണ് തീപിടുത്തമുണ്ടായത്

സ്വന്തം ലേഖകൻ

കോട്ടയം : കോട്ടയം ജനറൽ ആശുപത്രിക്ക് മുന്നിൽ പ്രവർത്തിക്കുന്ന സ്വീറ്റ് സ്റ്റോർ ബേക്കറിയിൽ തീപിടുത്തം. രാവിലെ ബേക്കറിയിലെത്തിയ ജീവനക്കാരാണ് തീയും പുകയും ഉയരുന്നത് കണ്ടത്.

തുടർന്ന് അഗ്നി രക്ഷാ സേനയേയും കോട്ടയം വെസ്റ്റ് പോലീസിനെയും വിവരമറിയിക്കുകയായിരുന്നു. അഗ്നിരക്ഷാ ഉദ്യോഗസ്ഥരെത്തി തീ നിയന്ത്രണ വിധേയമാക്കി.

തീപിടുത്തത്തെ തുടർന്ന് ബേക്കറിയുടെ സീലിങ്ങിന് അടക്കം കേടുപാടുകൾ സംഭവിച്ചിട്ടുണ്ട്.

കാര്യമായ നാശനഷ്ടം ഇല്ലെന്നാണ് വിലയിരുത്തൽ.ഷോർട്ട് സർക്യൂട്ടാണ് അപകടകാരണമെന്നാണ് പ്രാഥമിക നിഗമനം.