ജനാധിപത്യ അവകാശ സംരക്ഷണ സമിതി എന്ന സംഘടനയുടെ പേരില്‍ ഫിനാന്‍സില്‍ മുക്കുപണ്ടം പണയം വച്ച് തട്ടിപ്പ്; സംഭവത്തിൽ നിരവധി കേസുകളിൽ പ്രതികളായ നാല് പേർ പള്ളിയ്ക്കത്തോട് പോലീസിന്റെ പിടിയിൽ; പ്രതികളെ കോടതിയിൽ ഹാജരാക്കി റിമാന്റ് ചെയ്തു
കോട്ടയം: പള്ളിയ്ക്കത്തോട്ടില്‍ പ്രവര്‍ത്തിയ്ക്കുന്ന നരിപ്പാര ഫിനാന്‍സില്‍ മുക്കുപണ്ടം പണയം വച്ച കേസിൽ നാല് പേരെ പള്ളിയ്ക്കത്തോടു പോലീസ് അറസ്റ്റ് ചെയ്തു. വിജയന്‍ എന്ന വിളിയ്ക്കുന്ന പുരുഷോത്തമന്‍ പാണ്ടിമാക്കല്‍, ചിറങ്ങര വീട്ടിൽ ജിജി മാത്യു, കുഴിയ്ക്കത്തോട്ടി വീട്ടിൽ സുബൈര്‍, മഞ്ജു മുണ്ടാപ്ലാക്കല്‍ എന്നിവരാണ് അറസ്റ്റിലായത്.
തൊടുപുഴ കേന്ദ്രീകരിച്ച് പ്രവര്‍ത്തിയ്ക്കുന്ന ജനാധിപത്യ അവകാശ സംരക്ഷണ സമിതി എന്ന സംഘടനയുടെ പേരില്‍ സംഘടനയുടെ സംസ്ഥാന പ്രസിഡന്റ്‌ ആയ മൂന്നാം പ്രതി സുബൈറും കോട്ടയം ജില്ലാ സെക്രട്ടറി പാണ്ടിമാക്കല്‍ വിജയനും, സമിതിയുടെ സംസ്ഥാന കോര്‍ഡിനേറ്റര്‍ ജിജി മാത്യുവും ചേര്‍ന്ന് മുക്ക് പണ്ടം സംഘടിപ്പിച്ച് നാലാം പ്രതി മഞ്ജുവിന്റെ കൈവശം കൊടുത്തയച്ച് പരാതിക്കാരിയായ മേരി മാത്യുവിന്റെ പക്കല്‍ എത്തിച്ച് തട്ടിപ്പ് നടത്തുകയായിരുന്നു.
പ്രതികള്‍ പല സംഘടനകളുടെയും പേരില്‍ സമാന രീതിയിലുള്ള നിരവധി തട്ടിപ്പുകള്‍ നടത്തുന്നതായി പരാതി ഉയര്‍ന്നിട്ടുണ്ട്. അതിനെ പറ്റി സമഗ്രമായി അന്വേഷണം നടത്തുമെന്ന് പോലീസ് അറിയിച്ചു. ഒന്നാം പ്രതി വിജയന്‍റെ പേരില്‍ പാലാ, കോതമംഗലം, പള്ളിയ്ക്കത്തോട് പോലീസ് സ്റ്റേഷനുകളില്‍ കേസുകള്‍ നിലവിലുണ്ട്. രണ്ടാം പ്രതി ജിജിയുടെ പേരില്‍ എടത്തല, പെരുമ്പാവൂര്‍, തടിയിട്ടപറമ്പ്, തൃക്കാക്കര എന്നിവടങ്ങളിലും മൂന്നാം പ്രതി സുബൈറിന്റെ പേരില്‍ കളമശ്ശേരി, തൊടുപുഴ, മൂവാറ്റുപുഴ, തൃക്കാക്കര, കോതമംഗലം, പുത്തന്‍കുരിശ് എന്നീ പോലീസ് സ്റ്റേഷനുകളിലും കേസുകള്‍ നിലവിലുണ്ട്.
Whatsapp Group 1 | Whatsapp Group 2 |Telegram Group
പ്രതികളെ കാഞ്ഞിരപ്പള്ളി ഡി വൈ എസ് പി അനില്‍കുമാറിന്‍റെ നിര്‍ദ്ദേശ പ്രകാരം പള്ളിയ്ക്കത്തോട് എസ്എച്ച്ഓ കെ.പി തോംസണ്‍, എസ്ഐമാരായ ഷാജി, റെയ്നോള്‍ഡ്സ് , എ.എസ്സ്.ഐ മാരായ റെജി, ലക്ഷ്മി, സിപിഒമാരായ ഷമീര്‍, രാഹുല്‍ എന്നിവര്‍ ചേര്‍ന്ന് തൊടുപുഴ മൂവാറ്റുപുഴ ഭാഗങ്ങളില്‍ നിന്നും പിടികൂടുകയായിരുന്നു.
കോട്ടയം ജില്ല പോലീസ് മേധാവി ഷാഹുല്‍ ഹമീദ് ഐപിഎസിന്റെ നിര്‍ദ്ദേശം അനുസരിച്ച് കൂടുതല്‍ ആളുകള്‍ക്കെതിരെ പ്രതികള്‍ തട്ടിപ്പ് നടത്തിയിട്ടുണ്ടോയെന്നതിൽ വിശദമായ അന്വേഷണം ആരംഭിച്ചു. അറസ്റ്റ് ചെയ്ത പ്രതികളെ കാഞ്ഞിരപ്പള്ളി ഒന്നാം ക്ലാസ് മജിസ്ട്രേറ്റ് കോടതി മുമ്പാകെ ഹാജരാക്കി പതിനാലു ദിവസത്തേക്ക് റിമാന്റ് ചെയ്തു.
