താനൂര്‍ ബോട്ടപകടം; എറണാകുളത്ത് ടൂറിസ്റ്റ് ബോട്ടുകളില്‍ മിന്നല്‍ പരിശോധന; ബോട്ടുടമകള്‍ക്ക് രേഖകള്‍ സമര്‍പ്പിക്കാന്‍ ഒരു ദിവസം സമയം

സ്വന്തം ലേഖിക

മലപ്പുറം: താനൂരില്‍ നടന്ന ബോട്ട് ദുരന്തത്തിന്റെ പശ്ചാത്തലത്തില്‍ എറണാകുളത്ത് ടൂറിസ്റ്റ് ബോട്ടുകളില്‍ മിന്നല്‍ പരിശോധന.

പരിശോധനയില്‍ മതിയായ രേഖകള്‍ ഇല്ലെന്ന് കണ്ടെത്തിയ ബോട്ടുടമകള്‍ക്ക് ആവശ്യമായ രേഖകള്‍ സമര്‍പ്പിക്കാന്‍ ഒരു ദിവസം സമയം അനുവദിച്ചു. മരട് നഗരസഭാ പരിധിയിലെ ബോട്ടുകളിലാണ് പരിശോധന നടത്തുന്നത്.

നഗരസഭയിലെ സ്‌പെഷ്യല്‍ സ്‌ക്വാര്‍ഡ് വിഭാഗമാണ് നാലിടങ്ങളില്‍ പരിശോധന നടത്തിയത്.

യാത്രക്കാരുടെ സുരക്ഷ ഉറപ്പാക്കുന്നതിനുള്ള നടപടികളില്‍ അലംഭാവം കാണിക്കുന്നവര്‍ക്കെതിരെ കര്‍ശന നടപടികളുണ്ടാകുമെന്ന് നഗരസഭ മുന്നറിയിപ്പ് നല്‍കി. വരും മണിക്കൂറുകളിലും പരിശോധനകള്‍ നടക്കുമെന്ന് നഗരസഭ അറിയിച്ചു.