ലോറിയില്‍ കൊണ്ടുപോകുകയായിരുന്ന ആനയെ അമിത വേഗത്തിൽ വന്ന ലോറി ഇടിച്ചു; ഒരു കൊമ്പ് തെറിച്ചുപോയി

കൊച്ചി: ലോറിയില്‍ കൊണ്ടുപോകുകയായിരുന്ന ആനയെ എതിരെ വന്ന ലോറി ഇടിച്ചു.

ഒരു കൊമ്പ് തെറിച്ചുപോയി. ഇന്ന് പുലർച്ചെ അഞ്ച് മണിക്ക് മൂത്തകുന്നം – പറവൂർ ദേശീയപാതയില്‍ അണ്ടിപ്പിള്ളിക്കാവിലായിരുന്നു സംഭവം.

കൊളക്കാടൻ കുട്ടികൃഷ്ണൻ (20) എന്ന ആനയുടെ ഒരു കൊമ്പ് പൂർണ്ണമായി തെറിച്ചു പോകുകയായിരുന്നു.
കൊമ്പ് ഊരിപ്പോയ ഭാഗത്തെ രക്തസ്രാവം മൂലം ക്ഷീണിതനായ ആനയെ തൃശൂർ ചാവക്കാട് മണത്തലയില്‍ എത്തിച്ചു അടിയന്തര ചികിത്സ നല്‍കി വരികയാണ്.

ആനയെ കൊടുങ്ങല്ലൂർ ഭാഗത്തുനിന്നും മൂവാറ്റുപുഴയിലേയ്ക്ക് കൊണ്ടുപോകുകയായിരുന്നു. അപകടം ഉണ്ടാക്കിയ ഗ്യാസ് കയറ്റി വന്ന ലോറി നിർത്താതെ ഓടിച്ചു പോയി. ഈ വാഹനം അമിത വേഗത്തിലായിരുന്നുവെന്നാണ് റിപ്പോർട്ട്.