തിരുവനന്തപുരം: സംസ്ഥാനത്തെ വിദ്യാലയങ്ങളില്‍ ഭൗതികസാഹചര്യം മെച്ചപ്പെടുത്തുന്നതിനൊപ്പം പഠനനിലവാരം ഉയര്‍ത്തുന്നതിലും സര്‍ക്കാര്‍ പ്രതിജ്ഞാബദ്ധമെന്ന് പൊതുവിദ്യാഭ്യാസ വകുപ്പ് മന്ത്രി വി ശിവന്‍കുട്ടി.
പരവൂര്‍ കോട്ടപ്പുറം സര്‍ക്കാര്‍ എല്‍ പി സ്‌കൂളില്‍ നിര്‍മിച്ച ബഹുനില കെട്ടിടം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ഒരോകുട്ടിക്കും നിലവാരമേറിയ വിദ്യാഭ്യാസം ഉറപ്പാക്കുക എന്നതാണ് സര്‍ക്കാരിന്റെ മുഖ്യലക്ഷ്യമെന്ന് വിദ്യാഭ്യാസ മന്ത്രി വ്യക്തമാക്കി. പരീക്ഷകള്‍ നടത്തി അക്കാദമിക മികവ് വിലയിരുത്തും. പഠനം സന്തോഷകരമായ അനുഭവമാക്കാന്‍ നൂതനവിദ്യകളിലൂടെ പുതിയ പാഠ്യപദ്ധതി കൊണ്ടുവന്നു. അക്കാദമിക മികവിനോടൊപ്പം ശാരീരികവും മാനസികവുമായ വളര്‍ച്ചയ്ക്കും പ്രാധാന്യം നല്‍കും.
Whatsapp Group 1 | Whatsapp Group 2 |Telegram Group
വിദ്യാഭാസ മേഖലയിലെ ദേശീയ സര്‍വേയില്‍ 16-ാം സ്ഥാനത്തായിരുന്ന കേരളം ഇപ്പോൾ രണ്ടാം സ്ഥാനത്തെത്തി എന്നത് വലിയ മുന്നേറ്റമാണെന്നും അദ്ദേഹം വ്യക്തമാക്കി. കിഫ്ബി ഫണ്ടിന്റെ സഹായത്തോടെ 1 കോടി 7 ലക്ഷം രൂപ ചെലവഴിച്ചാണ് ബഹുനില കെട്ടിടം നിർമ്മിച്ചത്.
കെട്ടിടത്തിന്റെ നിര്‍മാണച്ചുമതല, തീരദേശ വികസന കോര്‍പറേഷനായിരുന്നു. ജി.എസ് ജയലാല്‍ എം.എല്‍.എ അധ്യക്ഷനായി. നഗരസഭ ചെയര്‍പേഴ്‌സണ്‍ പി. ശ്രീജ, വൈസ് ചെയര്‍പേഴ്‌സണ്‍ എ. സഫര്‍ കയാല്‍, സ്റ്റാന്‍ഡിങ് കമ്മിറ്റി അധ്യക്ഷരായ വി. അംബിക, എസ്. ഗീത, എസ്. ശ്രീലാല്‍, എസ്. മിനി, ജെ. ഷെരീഫ്, ഡി. ഡി. ഇ കെ.ഐ. ലാല്‍, ചാത്തന്നൂര്‍ എ.ഇ.ഒഎലിസബത്ത് ഉമ്മന്‍, എക്സിക്യൂട്ടീവ് എന്‍ജിനീയര്‍ ഐ ജി ഷിലു, രാഷ്ട്രീയപാര്‍ട്ടി പ്രതിനിധികള്‍, അധ്യാപകന്‍, വിദ്യാര്‍ഥികള്‍ തുടങ്ങിയവര്‍ പങ്കെടുത്തു.
