വടക്കൻ ഇറാനില്‍ ഭൂചലനം; 5.1 തീവ്രത രേഖപ്പെടുത്തി: താമസക്കാരെ മാറ്റി പാര്‍പ്പിച്ചു

തെഹ്റാൻ: ഇസ്രായേല്‍-ഇറാൻ സംഘർഷത്തിനിടെ വടക്കൻ ഇറാനില്‍ ശക്തമായ ഭൂചലനം. റിക്ടർ സ്കെയിലില്‍ 5.1 തീവ്രത രേഖപ്പെടുത്തിയ ഭൂചലനം ഇന്നലെ വൈകിട്ടോടെയാണ് അനുഭവപ്പെട്ടതെന്ന് യുഎസ് ജിയോളജിക്കല്‍ സർവേ അറിയിച്ചു.

സെംനാൻ, ടെഹ്‌റാൻ, അല്‍ബോർസ് പ്രവിശ്യകളിലാണ് പ്രധാനമായും ഭൂചലനം ഉണ്ടായത്. പ്രാദേശിക സമയം രാത്രി 9:19ന് സെംനാനില്‍ നിന്ന് ഏകദേശം 35 കിലോമീറ്റർ തെക്ക് പടിഞ്ഞാറായി 10 കിലോമീറ്റർ ആഴത്തിലാണ് ഭൂകമ്ബത്തിന്റെ പ്രഭവകേന്ദ്രം.

നാശനഷ്ടങ്ങളോ ആളപായങ്ങളോ റിപ്പോർട്ട് ചെയ്തിട്ടില്ല. എന്നാല്‍, ശക്തിയേറിയ പ്രകമ്ബനമാണ് അനുഭവപ്പെട്ടതെന്ന് താമസക്കാർ പറഞ്ഞു. ബാധിത പ്രദേശങ്ങളില്‍ നിന്ന് മുൻകരുതല്‍ എന്ന നിലയില്‍ പലരും കെട്ടിടങ്ങള്‍ ഒഴിപ്പിച്ചു. യൂറോപ്യൻ-മെഡിറ്ററേനിയൻ സീസ്മോളജിക്കല്‍ സെന്ററും ഇറാൻ അധികൃതരും ഭൂചലനം സ്ഥിരീകരിച്ചു.