സ്വന്തം ലേഖിക
കോഴിക്കോട്: കോഴിക്കോട് കുറ്റിക്കാട്ടൂരില് ലഹരി മാഫിയ ക്യാരിയറാക്കിയ പെണ്കുട്ടിക്ക് തുടര് പഠനം നിഷേധിക്കുന്നെന്ന് കുടുംബം.
തുടര് പഠനത്തിനായി സ്കൂളില് പ്രവേശിപ്പിക്കാന് അധികൃതര് താത്പര്യം കാട്ടുന്നില്ലെന്നാണ് രക്ഷിതാക്കള് ആരോപിക്കുന്നത്. സ്കൂളിലെത്താന് അനുവദിക്കുന്നില്ലെന്നും പരീക്ഷ എഴുതാന് മാത്രമാണ് സ്കൂള് അധികൃതര് അനുമതി നല്കിയതെന്നും പെണ്കുട്ടിയുടെ അമ്മ പറഞ്ഞു.
Whatsapp Group 1 | Whatsapp Group 2 |Telegram Group
കുട്ടിക്ക് ലഹരി നല്കിയിരുന്നവര് ഇപ്പോഴും സ്വൈര്യവിഹാരം നടത്തുകയാണെന്നും അമ്മ വ്യക്തമാക്കി.
ലഹരി മാഫിയ ക്യാരിയറായി ഉപയോഗിച്ച പെണ്കുട്ടി സ്വകാര്യ ആശുപത്രിയിലെ ഡി അഡിക്ഷന് കേന്ദ്രത്തില് ചികിത്സയിലാണുള്ളത്. പഠനം ഇടയ്ക്ക് വെച്ച് നിലച്ചതിനാല് തുടര് പഠനത്തിന് സ്കൂള് അധികൃതരെ സമീപിച്ചെങ്കിലും താത്പര്യം കാട്ടിയില്ലെന്നാണ് അമ്മ പറയുന്നത്.
പരീക്ഷ എഴുതാന് അനുവദിക്കാമെന്ന് സ്കൂള് അധികൃതര് അറിയിച്ചതായും അമ്മ പറഞ്ഞു. അതേസമയം, കുട്ടിക്ക് ലഹരി നല്കിയിരുന്ന ആളുകള് ഇപ്പോഴും നാട്ടില് കറങ്ങി നടക്കുന്നുണ്ടെന്നും ലഹരി മാഫിയയുടെ ഭീഷണി ഇപ്പോഴുമുണ്ടെന്നും പെണ്കുട്ടിയുടെ അമ്മ പ്രതികരിച്ചു.
