തലയോലപ്പറമ്പ് പാലാങ്കടവ് പാലത്തിനു സമീപം ആറ്റിൽ കുളിക്കാനിറങ്ങിയ യുവാവ് മുങ്ങി മരിച്ചു

സ്വന്തം ലേഖിക

വൈക്കം: തലയോലപ്പറമ്പ് വെട്ടിക്കാട്ട് മുക്കിനു
സമീപം പാലാങ്കടവ് പാലത്തിന് താഴെ ആറ്റിൽ കുളിക്കാനിറങ്ങിയ യുവാവ് മുങ്ങി മരിച്ചു.

കടുത്തുരുത്തിയിലെ സ്വകാര്യ കമ്പനിയിൽ അഭിമുഖത്തിനായി എത്തിയ തിരുവനന്തപുരം സ്വദേശി അരവിന്ദ് (23)ആണ് മരിച്ചത്.

തിങ്കളാഴ്ച രാവിലെ പത്തു മണിയോടെയായിരുന്നു സംഭവം. തിരുവനന്തപുരം സ്വദേശികളായ അഞ്ചംഗം സംഘം കടുത്തുരുത്തിയിലെ സ്വകാര്യ സ്ഥാപനത്തിൽ അഭിമുഖത്തിനായി എത്തിയതായിരുന്നു. ഫീൽഡ് വർക്ക് ജോലികൾ നിർദേശിച്ച പ്രകാരമാണ് ഇവർ സ്ഥലത്ത് എത്തിയത്.

രാവിലെ പാലാങ്കടവ് പാലത്തിനു സമീപമിരുന്ന് ഭക്ഷണം കഴിച്ച ശേഷം അരവിന്ദ് ആറ്റിൽ കുളിക്കാനിറങ്ങുകയായിരുന്നു. സംഘത്തിൽ അരവിന്ദിനു മാത്രമാണ് നീന്തൽ അറിയാമായിരുന്നത്.

നീന്തുന്നതിനിടെ അരവിന്ദ് വെള്ളത്തിൽ താന്നു പോവുകയായിരുന്നു. ഇത് കണ്ട് കരയിൽ നിന്ന സുഹൃത്തുക്കൾ ബഹളം വച്ചതോടെ നാട്ടുകാർ ഓടികൂടി.

നാട്ടുകാർ തലയോലപ്പറമ്പ് പൊലീസ് സ്റ്റേഷനിൽ വിവരം അറിയിച്ചതോടെ എസ്.ഐ വിദ്യയുടെ നേതൃത്വത്തിലുള്ള പൊലീസ് സംഘവും അഗ്നിരക്ഷാ സേനയും സ്ഥലത്ത് എത്തി. തുടർന്നു നടത്തിയ തിരച്ചിലിലാണ് മൃതദേഹം കണ്ടെത്തിയത്.

പോസ്റ്റ്‌മോർട്ടം അടക്കമുള്ള നടപടികൾ പൂർത്തിയാക്കിയ ശേഷം മൃതദേഹം ബന്ധുക്കൾക്കു വിട്ടുകൊടുക്കും. മൃതദേഹം വൈക്കം താലൂക്ക് ആശുപത്രി മോർച്ചറിയിലേയ്ക്കു മാറ്റി.