വീട്ടിൽ നായയെ വളർത്തുന്നുണ്ടോ? എങ്കിൽ ഇക്കാര്യങ്ങൾ അറിയാതെ പോകരുത്

വീട്ടിൽ നായ്ക്കളെ വളർത്താത്തവർ കുറവായിരിക്കും. സ്നേഹം തരാനും സംരക്ഷിക്കാനുമൊക്കെ വീട്ടിൽ ഒരു നായയുണ്ടെങ്കിൽ അത് സന്തോഷം നൽകുന്ന കാര്യമാണ്. മൃഗങ്ങളെ വളർത്തുമ്പോൾ അവരെ നന്നായി പരിപാലിക്കേണ്ടതും നമ്മുടെ ഉത്തരവാദിത്തമാണ്. വീട്ടിൽ നായയെ വളർത്തുന്നതിന് ചില നിയമങ്ങളൊക്കെയുണ്ട്. അവ എന്തൊക്കെയാണെന്ന് അറിയാം.

1. വീട്ടിൽ നായയെ വളർത്തുമ്പോൾ എല്ലാ വർഷവും പേവിഷബാധക്കുള്ള പ്രതിരോധ കുത്തിവയ്പ് എടുത്തിരിക്കണം. വാക്സിനേഷൻ സർട്ടിഫിക്കറ്റ് ലഭിക്കുമ്പോൾ അത് നിങ്ങൾ താമസിക്കുന്ന സ്ഥലത്തെ തദ്ദേശ സ്വയംഭരണ സ്ഥാപനത്തിൽ നിന്നും ലൈസൻസ് എടുക്കേണ്ടതുണ്ട്. ഓരോ വർഷവും ലൈസൻസ് പുതുക്കാനും മറക്കരുത്.

2. നായയെ വീട്ടിൽ വളർത്തുമ്പോൾ പൊതുജനങ്ങൾക്ക് ബുദ്ധിമുട്ട് ഉണ്ടാക്കുന്ന വിധത്തിൽ വളർത്തുന്നത് കുറ്റകരമാണ്. ഇത് 2024 ഭാരതീയ ന്യായസംഹിതയിലെ സെക്ഷൻ 291 പ്രകാരം 6 മാസം തടവും 5000 രൂപ പിഴയും ലഭിക്കാൻ കാരണമാകുന്നു. ഫ്ലാറ്റിൽ വളർത്തുമ്പോഴും മറ്റുള്ളവർക്ക് അസൗകര്യം ഉണ്ടാക്കുന്ന വിധത്തിൽ വളർത്താൻ പാടുള്ളതല്ല.

3. നായ്ക്കളിൽ സൗന്ദര്യവർധക ശസ്ത്രക്രിയകൾ ചെയ്യാൻ നിയമം അനുവദിക്കുന്നില്ല. കേന്ദ്രനിയമമായ 2017ലെ ഡോഗ് ബ്രീഡിങ് റൂൾ പ്രകാരം കോസ്‌മെറ്റിക് സർജറികൾ നിയമവിരുദ്ധമാണ്.

4. പേവിഷബാധയുണ്ടെന്ന് സംശയമുള്ള നായ്ക്കളെ ഉടനെ കൊല്ലാൻ പാടില്ല. അതിനെ 10 ദിവസം നിരീക്ഷിച്ചതിന് ശേഷം പേവിഷബാധയുണ്ടെന്ന് വ്യക്തമായാൽ സ്വാഭാവിക മരണത്തിനല്ലാതെ കൊല്ലാൻ നിയമം അനുവദിക്കുന്നില്ല.

5. നായ്ക്കളെ ദയാവധം ചെയ്യാൻ പാടില്ല. എങ്കിലും ജീവൻ രക്ഷിക്കാൻ കഴിയാത്ത വിധത്തിൽ ഗുരുതരമായ രോഗം അല്ലെങ്കിൽ ശരീരത്തിലുണ്ടായ ഗുരുതര മുറിവുകൾ തുടങ്ങിയ സാഹചര്യങ്ങളിൽ നായ്ക്കളെ ദയാവധം ചെയ്യാൻ നിയമമുണ്ട്.

6. നായ്ക്കൾക്ക് ഭക്ഷണവും വെള്ളവും നൽകാതിരിക്കുകയോ, ദേഹോപദ്രവം ചെയ്യുകയോ ചെയ്താൽ ഭാരതീയ ന്യായസംഹിതയിലെ സെക്ഷൻ 345 പ്രകാരം 6 മാസം തടവും 5000 രൂപ പിഴയും ലഭിച്ചേക്കാം.

7. മൃഗങ്ങളോട് ക്രൂരത കാണിക്കുന്നത് നിങ്ങളുടെ ശ്രദ്ധയിൽപ്പെട്ടാൽ സംസ്ഥാന മൃഗക്ഷേമ ബോർഡിന് പരാതി നൽകാം. അല്ലെങ്കിൽ കൺവീനർ, സംസ്ഥാന മൃഗക്ഷേമ ബോർഡ്, മൃഗസംരക്ഷണ വകുപ്പ് ഡയറക്റ്ററേറ്റ്, വികാസ്ഭവൻ പി.ഒ തിരുവനന്തപുരം എന്ന വിലാസത്തിൽ കത്തയക്കാം. പരാതി [email protected] എന്ന വിലാസത്തിൽ മെയിലായും അയക്കാവുന്നതാണ്.