കളക്‌ടറമ്മയ്‌ക്കൊപ്പം മൽഹാർ കരുതലേകി​ സോഷ്യൽ മീഡിയ;ഇപ്പോൾ താരം പത്തനംതിട്ട കളക്‌ടർ ദിവ്യ എസ് അയ്യരും മകൻ മൽഹാറും…

ആകെയുള്ള ഒരു അവധിദിനത്തിൽ വേദിയിൽ ജില്ലാ കളക്‌ടറായ അമ്മ സംസാരിക്കുമ്പോൾ മാറി​ നി​ൽക്കാൻ മൽഹാറിനാവി​ല്ലായി​രുന്നു. ആ മൂന്നരവയസുകാരന് അമ്മയ്‌ക്കൊപ്പം നി​ൽക്കണം, അമ്മ ഒന്നു ചേർത്തു പിടിക്കണം. ഓടിയെത്തിയപ്പോൾ അമ്മ അവനെ എടുത്തുയർത്തി പ്രസംഗി​ച്ചു. മൽഹാറും അമ്മയും ഡബി​ൾ ഹാപ്പി.

അടൂർ അന്താരാഷ്ട്ര ചലച്ചിത്രമേളയുടെ സമാപനത്തി​ലായി​രുന്നു സ്നേഹം തുളുമ്പി​യനിമിഷങ്ങൾ. ജില്ലാ കളക്‌ടർ ഡോ. ദിവ്യ എസ്.അയ്യരുടെ ഈ ചിത്രം ഡെപ്യൂട്ടി സ്‌പീക്കർ ചിറ്റയം ഗോപകുമാർ ഫേസ്‌ബുക്കിലി​ട്ടതോടെ അഭി​നന്ദനങ്ങളും വി​മർശനങ്ങളുമുയർന്നു. ”ഇത് അനുകരണീയമല്ല, കളക്ടർ തമാശക്കളിയായാണ് പരിപാടിയെ കണ്ടത്. ഇത് അവരുടെ വീട്ടുപരിപാടിയല്ല, ഓവറാക്കി ചളമാക്കി “”എന്ന് കവി രാജീവ് ആലുങ്കൽ പറഞ്ഞതോടെ മറുപടിയുമായി കളക്ടറുടെ ഭർത്താവും മുൻ എം.എൽ.എയുമായ ശബരീനാഥെത്തി​.

തി​രക്കി​നി​ടയി​ൽ കിട്ടുന്ന അവധിദിനം കുഞ്ഞിനോടൊപ്പം ചെലവഴിച്ചതാണ് ദിവ്യയെന്നും ഇത് സംഘാടകരെ അറിയിച്ചിരുന്നെന്നും ശബരിനാഥ് പറഞ്ഞു. രാവിലെ 10 മുതൽ രാത്രി 8 വരെ ജോലി ചെയ്യുന്നയാളാണ് ദിവ്യ. രാത്രി എട്ടിന് ശേഷം ദിവ്യയെ കണ്ടില്ലെങ്കിൽ മൽഹാർ കരയും. തൊഴിലെടുക്കുന്ന ഭൂരിഭാഗം സ്ത്രീകളുടെയും പ്രശ്‌നമാണി​തെന്നായി​രുന്നു ശബരീനാഥി​ന്റെ നി​രീക്ഷണം. ഇതോടെ ജോലി​ ചെയ്യുന്ന അമ്മമാരുടെ പ്രയാസങ്ങളി​ലേക്കായി​ ചർച്ച.

”ഓസ്‌ട്രേലിയൻ പാർലമെന്റിലിരുന്ന് സെനറ്റർ ലാരിസ വാട്ടേഴ്‌സും കാനഡ പാർലമെന്റി​ൽ മന്ത്രിയായിരുന്ന കരീന ഗോൾഡും കുഞ്ഞുങ്ങൾക്ക് മുലയൂട്ടിയതും യു.എൻ ജനറൽ അസംബ്ലിയിൽ കുഞ്ഞുമായി ന്യൂസിലൻഡ് പ്രധാനമന്ത്രി ജസിന്ത ആർഡേൻ എത്തിയതും നമ്മൾ ആഘോഷി​ച്ചു. അതേ സമയം സ്വന്തമി​ടത്തി​ൽ ഇത് നമുക്ക് അശ്ളീലം..”” ദിവ്യയെ അനുകൂലിച്ചവരുടെ വാദം ഇങ്ങനെ.

“വിവാദത്തിലുപരി ചർച്ച ഉയർന്നതി​ൽ സന്തോഷം. കു‌ഞ്ഞിന് രോഗമായാലും നോക്കാനാവാത്ത അമ്മമാരുണ്ട്. ഞായർ പരിപാടികളിൽ കുഞ്ഞ് വരുന്നതി​ൽ ബുദ്ധിമുട്ടുണ്ടോ എന്ന് തി​രക്കാറുണ്ട്. സാംസ്‌കാരിക ചടങ്ങി​ൽ കുട്ടികൾ വരുന്നത് നല്ലതാണ്. അടൂരി​ലും ധാരാളം കുട്ടികളുണ്ടായിരുന്നു.”