കോട്ടയം: ബാല്യകാല സ്മരണകള്‍ ഉണർത്തുന്ന ഒരു പലഹാരമാണ് ദില്‍ഖുഷ്. ഒറ്റക്കാഴ്ചയില്‍ ബണ്‍ ആണെന്നു തോന്നാം. എന്നാല്‍ ഉള്ളിലാണ് രഹസ്യം ഒളിഞ്ഞിരിക്കുന്നത്.
തേങ്ങയും ഡ്രൈ ഫ്രൂട്സും ചേർന്ന തേനൂറുന്ന മധുരമാണിതിന്. ഇത് വീട്ടില്‍ തന്നെ തയ്യാറാക്കാം. റെസിപ്പി നോക്കാം.
ചേരുവകള്‍
Whatsapp Group 1 | Whatsapp Group 2 |Telegram Group
പാല്‍- 1/4 കപ്പ്
പഞ്ചസാര- 1 ടീസ്പൂണ്‍
യീസ്റ്റ്- 1 ടീസ്പൂണ്‍
എണ്ണ- 2 ടേബിള്‍സ്പൂണ്‍
പഞ്ചസാര- 2 ടേബിള്‍സ്പൂണ്‍
ഉപ്പ്- 1/2 ടീസ്പൂണ്‍
പാല്‍- 1/2 കപ്പ്+2 ടേബിള്‍സ്പൂണ്‍
മൈദ- 2 കപ്പ്
തേങ്ങ- 1/2 കപ്പ്
ടൂട്ടി ഫ്രൂട്ടി- 1/2 കപ്പ്
ചെറി- 1 /2 ടേബിള്‍സ്പൂണ്‍
ഏലയ്ക്ക- 4
പഞ്ചസാര- 21/2 ടേബിള്‍സ്പൂണ്‍
പാല്‍പ്പൊടി- 1 ടേബിള്‍സ്പൂണ്‍
വെണ്ണ- 1 ടേബിള്‍സ്പൂണ്‍
പാല്‍- 1 ടേബിള്‍സ്പൂണ്‍
തയ്യാറാക്കുന്ന വിധം
ഒരു ബൗളിലേയ്ക്ക് കാല്‍ കപ്പ് ചെറുചൂടുള്ള പാലെടുക്കാം. അതിലേയ്ക്ക് ഒരു ടീസ്പൂണ്‍ പഞ്ചസാരയും ഒരു ടീസ്പൂണ്‍ യീസ്റ്റും ചേർത്തിളക്കി യോജിപ്പിച്ച്‌ അര മണിക്കൂർ മാറ്റി വെയ്ക്കാം. ഇതിലേയ്ക്ക് രണ്ട് ടേബിള്‍സ്പൂണ്‍ സണ്‍ഫ്ലവർ ഓയിലും, രണ്ട് ടേബിള്‍സ്പൂണ്‍ പഞ്ചസാരയും അര ടീസ്പൂണ്‍ ഉപ്പും ചേർത്തിളക്കി യോജിപ്പിക്കാം. ഇതിലേയ്ക്ക് അര കപ്പ് പാല്‍ ഒഴിച്ചിളക്കാം. ഒപ്പം രണ്ട് കപ്പ് മൈദ ചേർത്ത് കട്ടകളില്ലാതെ ഇളക്കാം. രണ്ട് ടേബിള്‍സ്പൂണ്‍ പാല്‍ കൂടി ചേർത്തിളക്കി യോജിപ്പിക്കാം. ശേഷം കൈ ഉപയോഗിച്ച്‌ കുഴച്ച്‌ മാവ് തയ്യാറാക്കാം. മുകളില്‍ അല്‍പ്പം എണ്ണ പുരട്ടി അടച്ച്‌ മാറ്റി വെയ്ക്കാം.
തുടർന്ന് മറ്റൊരു ബൗളില്‍ അര കപ്പ് തേങ്ങ ചിരകിയതെടുക്കാം. അതിലേയ്ക്ക് അര കപ്പ് ടൂട്ടി ഫ്രൂട്ടിയും, അര ടേബിള്‍സ്പൂണ്‍ ഉണങ്ങിയ ചെറിപ്പഴവും, ഏലയ്ക്ക ചേർത്ത് പൊടിച്ച രണ്ടര ടേബിള്‍സ്പൂണ്‍ പഞ്ചസാരയും ചേർത്തിളക്കാം. ഒപ്പം ഒരു ടേബിള്‍സ്പൂണ്‍ പാല്‍പ്പൊടിയും ഒരു ടേബിള്‍സ്പൂണ്‍ വെണ്ണ അലിയിച്ചതും ഒരു ടേബിള്‍സ്പൂണ്‍ ചെറുചൂടുള്ള പാലും ചേർത്ത് യോജിപ്പിക്കാം.
അടച്ചു വച്ചിരിക്കുന്ന മാവ് തുറന്ന് രണ്ട് ഭാഗങ്ങളാക്കി പരത്താം. അധികം കട്ടി കുറയ്ക്കാതെ വേണം പരത്താൻ. ഇതിനു മുകളിലേയ്ക്ക് തയ്യാറാക്കിയ സ്റ്റഫിങ് മിശ്രിതം വെയ്ക്കാം. ശേഷം മാവിൻ്റെ രണ്ടാമത്തെ ഭാഗം പരത്തി അതിനു മുകളില്‍ വെച്ച്‌ അരികുകള്‍ ഒട്ടിച്ച്‌ അടയ്ക്കാം. ഇത് ഓവനില്‍ വച്ചോ കുക്കർ ബേക്ക് ചെയ്തോ തയ്യാറാക്കാം. ബേക്ക് ചെയ്തെടുത്താല്‍ അല്‍പ സമയം തണുക്കാൻ വെയ്ക്കാം.
