സ്വന്തം ലേഖിക
ആലപ്പുഴ :കഴിച്ച ഭക്ഷണത്തിന് അമിതവില ഈടാക്കിയെന്ന പി.പി.ചിത്തരഞ്ജന് എംഎല്എയുടെ പരാതിയില് നടപടിയെടുക്കാന് നിയമമില്ലെന്ന് ജില്ലാ കലക്ടര് ഡോ.രേണു രാജ് . ബുദ്ധിമുട്ട് വകുപ്പ് മന്ത്രിയെ അറിയിച്ചിട്ടുണ്ടെന്നും കലക്ടര് പറഞ്ഞു.
എംഎല്എയുടെ പരാതിയെക്കുറിച്ച് അന്വേഷിച്ചു റിപ്പോര്ട്ട് നല്കാന് ജില്ലാ സിവില് സപ്ലൈസ് ഓഫിസര്ക്കു നിര്ദേശം നല്കിയതായി കലക്ടര് ഡോ. രേണു രാജ് അറിയിച്ചിരുന്നു. എംഎല്എയുടെ പരാതി അന്വേഷിച്ചു ജില്ലാ സപ്ലൈ ഓഫീസര് റിപ്പോര്ട്ട് നല്കിയതിനു പിന്നാലെയാണ് കലക്ടര് തീരുമാനം അറിയിച്ചത് .
Whatsapp Group 1 | Whatsapp Group 2 |Telegram Group
അഞ്ച് അപ്പത്തിനും 2 മുട്ടക്കറിക്കും 184 രൂപ ഈടാക്കിയെന്ന് ആരോപിച്ചാണ് കണിച്ചുകുളങ്ങരയിലെ ഹോട്ടലിനെതിരെ മന്ത്രി പരാതി നല്കിയത്. ‘ ഫാന് സ്പീഡ് കൂട്ടിയിട്ടാല് പറന്നുപോകുന്ന വലുപ്പത്തിലുള്ള ഒരപ്പത്തിന് 15 രൂപയാണ് വില. നാലര രൂപ വില വരുന്ന ഒരു മുട്ടയും അല്പം ഗ്രേവിയും നല്കിയതിന് 50 രൂപ. അതൊരു സ്റ്റാര് ഹോട്ടലല്ല. എസി ഹോട്ടലെന്നു പറഞ്ഞിട്ടുണ്ടെങ്കിലും എസി ഇല്ല. വിലവിവരപ്പട്ടിക പ്രദര്ശിപ്പിച്ചിട്ടില്ല.
ചില ഹോട്ടലുകളില് രണ്ടു കറികളുള്ള വെജിറ്റേറിയന് ഊണ് കഴിക്കണമെങ്കില് 100 രൂപ നല്കണം. ഒരു ചായയ്ക്ക് അഞ്ചു രൂപയും ഊണിന് 30 രൂപയും നല്കുന്ന സാധാരണ ഹോട്ടലുകള് ഇപ്പോഴുമുണ്ട്. അപ്പോഴാണ് ചിലര് കൊള്ളലാഭമുണ്ടാക്കാന് കൃത്രിമ വിലക്കയറ്റം നടത്തുന്നത്’ ഇങ്ങനെയായിരുന്നു എം എല് എ യുടെ ആരോപണം.
അതേ സമയം അമിതവില ഈടാക്കിയിട്ടില്ലെന്നും ഭക്ഷണം തയാറാക്കി വില്ക്കുന്നതിനുള്ള ചെലവിന് ആനുപാതികമായി മാത്രമേ വില ഈടാക്കുന്നുള്ളൂവെന്നാണ് ഹോട്ടല് അധികൃതര് പറയുന്നത്.
