നാലു ദിവസം പ്രായമായ കുഞ്ഞിനെ പള്ളി മുറ്റത്ത് ഉപേക്ഷിച്ച അമ്മ അറസ്റ്റിൽ ; കുഞ്ഞിനെ ഉപേക്ഷിച്ചത് രഹസ്യബന്ധം വീട്ടുകാർ അറിയാതിരിക്കാൻ
കോഴിക്കോട്: നാലു ദിവസം പ്രായമുള്ള കുട്ടിയെ പള്ളിമുറ്റത്ത് ഉപേക്ഷിച്ച അമ്മ അറസ്റ്റില്‍. കരിപ്പൂര്‍ വിമാനത്താവളത്തില്‍ കഫറ്റീരിയയില്‍ ജോലി ചെയ്യുന്ന 21കാരിയെയാണ് പന്നിയങ്കര പൊലീസ് അറസ്റ്റ് ചെയ്തത്. സ്വദേശമായ തൃശൂരില്‍ ചെന്നാണ് യുവതിയെ കസ്റ്റഡിയിലെടുത്തത്. പിന്നീട് അറസ്റ്റ് രേഖപ്പെടുത്തി.
കുട്ടിയുടെ പിതാവ് യുവതിയുടെ സഹപ്രവര്‍ത്തകനും മലപ്പുറം തവന്നൂര്‍ സ്വദേശിയുമായ 21കാരനാണ്. ഒന്നര വര്‍ഷം മുൻപാണ് ഇരുവരും ബന്ധം തുടങ്ങിയത്. എന്നാൽ വീട്ടുകാരറിയാത്ത ബന്ധമായതിനാലാണ് കുഞ്ഞിനെ ഉപേക്ഷിച്ചതെന്നും പൊലീസ് പറഞ്ഞു.
ഇരുവരും കരിപ്പൂരില്‍ തന്നെയായിരുന്നു താമസം.ഇടക്ക് മാത്രമാണ് യുവതി വീട്ടില്‍ പോയിരുന്നത്. എന്നാൽ യുവതി ഗര്‍ഭിണിയാണെന്ന് മാതാവിന് സംശയം തോന്നിയിരുന്നു. എങ്കിലും വിദഗ്ധമായി മാതാവിനെ തെറ്റിദ്ധരിപ്പിക്കുകയാരുന്നു. പിന്നീട് ഗള്‍ഫില്‍ ജോലിതേടി പോയ യുവാവിനെ പ്രസവത്തിന് ഒരാഴ്ച മുൻപ് യുവതി വിളിച്ചുവരുത്തിയിരുന്നു. ശേഷം ഇവര്‍ ബംഗളൂരു ആര്‍.കെ ആശുപത്രിയില്‍ ചികിത്സ തേടി. പ്രസവം കഴിഞ്ഞ് ട്രെയിനില്‍ കോഴിക്കോട്ടെത്തി ഇരുവരും യുവാവിന്റെ ബുള്ളറ്റില്‍ പന്നിയങ്കര പള്ളിയിലെത്തി കുഞ്ഞിനെ ഉപേക്ഷിക്കുകയായിരുന്നു.
Whatsapp Group 1 | Whatsapp Group 2 |Telegram Group
കുഞ്ഞിനെ ഉപേക്ഷിച്ച ദിവസത്തെ സി.സി.ടി.വി ദൃശ്യങ്ങള്‍ പൊലീസ് പരിശോധിച്ചിരുന്നു. ഇതിൽ സംശയകരമായ ബുള്ളറ്റ് ശ്രദ്ധയില്‍ പെടുകയും ആ ബുള്ളറ്റ് നമ്പര്‍ വഴി യുവാവിന്റെ വീട്ടിലെത്തി. അവിടെനിന്നാണ് യുവതിയുടെ വിവരങ്ങള്‍ പൊലീസിന് ലഭിച്ചത്. എന്നാല്‍, കുഞ്ഞിനെ ഉപേക്ഷിച്ച ശേഷം നവംബര്‍ ഒന്നിന് യുവാവ് ഗള്‍ഫിലേക്ക് തിരിച്ചുപോയതിനാല്‍ പിടികൂടാനായിട്ടില്ല.
സാധാരണ പ്രസവമായിരുന്നെങ്കിലും പ്രസവശേഷം വേണ്ടത്ര ചികിത്സ ലഭിക്കാത്തതിനാല്‍ ആരോഗ്യ പ്രശ്നങ്ങള്‍ നേരിടുന്ന യുവതിയെ കോഴിക്കോട് മെഡിക്കല്‍ കോളജ് ഐ.എം.സി.എച്ചില്‍ പ്രവേശിപ്പിച്ചിരിക്കുകയാണ്. കുഞ്ഞ് ശിശുക്ഷേമ സമിതിയുടെ സെന്റ് വിന്‍സന്‍റ് ഹോമിലാണുള്ളത്
